Offside › Набрзинка

Каде е ракометна Македонија и кој може да ја сопре големата Данска?

15 јануари 2026

Гидсел и Нилсен, Мем и Ремили, Клар и Бергендал, Магнусен и Кристијансон, Кнор и Куштер, Дујшебаев и Тарафета, браќата Кошта. Најдобрите светски ракометари, во зависност од поддршката на другиот дел од тимот, ќе може да се надеваат на најсјајното одличје во европскиот ракомет.
А таму, Данска, пред домашна публика и дополнителен мотив да ги обедини сите титули (по ЛОИ и СП), е фаворит, голем фаворит, но на завршниот турнир (каде што секако ќе се пласира) се игра еден натпревар и оставаме простор Франција и особено Шведска да ѝ го „скинат скалпот“.
А која е нашата цел на претстојното ЕП? Официјално, не знаеме. Македонија има уигран состав, играчи што веќе неколку години по ред се на големите натпреварувања, дузина суперискусни играчи, „најдобра лига“ во регионот, буџет за исполнување на сѐ што е планирано во однос на подготовките на националниот тим, суперпобеднички „воспитан“ стручен штаб…
Од обезбедување место во повластен барабан до поминување на групата, каде што се Данска, Португалија, па и Романија. Тоа се нашите амбиции, скриени, јавно искажани или наметнати.

извор

Ќе се одложуваат натпревари во Евролига, Јасикевичиус и 14 кошаркари од разни клубови заглавени во Дубаи

2 март 2026

Првиот човек на белградски Партизан Остоја Мијаиловиќ во вели дека постои голема веројатност многу натпревари од Евролига да бидат одложени а истата е под голем знак на прашање поради новонастаната ситуација на Блискиот Исток и војната меѓу Израел и САД против Иран.
Евролигашкото 30. коло по ред, треба да се игра во четврток и петок неделава, но прашање е кои натпревари ќе се одиграат а кои ќе се одложат. Сигурно е дека големото дерби меѓу израелските ривали Макаби Тел Авив и Хапоел Тел Авив е одложено од безбедносни причини затоа што Израел е во војна, а овие два клуба речиси сигурно како до неодамна, ќе се вратат да играат во Србија и во Бугарија.
Првиот човек на Партизан во разговор за белградска телевизија К1 рекол дека од неговиот клуб тројца играчи (Дилан Осетковски, Двејн Вашингтон и Шејк Милтон) се заглавени во Дубаи. Таму е уште и тренерот на европскиот шампион Фенербахче Шарунас Јасикевичиус и уште 14 евролигашки играчи. „Нашите играчи отидоа на одмор во Дубаи како и многу луѓе кои во последните 10-15 години го гледаат Дубаи како врвно место за одмор и забава. Отидоа и тоа е нивно право, не можат да добиваат препораки каде да одат а каде да не одат“, вели Мијаиловиќ.
Некои од кошаркарите од Евролига кои се во Дубаи веќе тренирале со КК Дубаи кој во четврток требаше да гостува во Белград на дуел против Партизан но тој меч веројатно ќе се одложи.
„Единствен аеродром кој работи во околина таму е тој во Оман. Отежната е и ситуацијата како да се префрлат (кошаркарите и тренерите) таму, по копнен пат тоа е четири ипол часа. Во овие моменти нема услови тоа да се изведе. Нашите играчи се наша грижа, но ако земеме предвид дека во ОАЕ има 11 милиони жители а само 1 милион се Емирати а сите останати емигранти, тоа значи дека не се само нашите играчи единствена грижа. Многумина чекаат да се вратат од тие подрачја. Ова е шок за сите нас“.

извор

Трагедија: во гранатирање училишна сала во Иран загинале 20 млади одбојкарки

2 март 2026

Во напад на спортска сала во провинцијата Фарс во Иран загинале 20 млади женски одбојкарки. Нападите ги извеле здружено Израел и САД во саботата околу 17 часот по локално време. Иранската телевизија Ал Мајадин цитирала локални власти кои соопштиле дека одбојкарки биле убиени на тренинг во гимназиска сала во градот Ламерд во јужен Иран, во провинцијата Фарс.
Нападот според новинската агенција ИРИБ бил изведен кога внатре во салата имало деца кои играле одбојка. Агенцијата Ташним пренесува дека во нападите биле погодени најмалку четири други објекти во градот Ламерд.
Во саботата Иран соопшти дека во друг напад на женско училиште загинале 200 лица од кои повеќето ученички во училиштето и дека зад нападот стои Вашингтон, а истиот бил изведен со ракети „томахавк“.
Нападот врз женските одбојкарки го осуди и Меѓународната одбојкарска федерација. „Изразуваме најдлабоко сочувство на семејствата на настраданите и на сите кои се погодени од оваа криза која се развива“, стои во соопштението. Меѓународната одбојкарска федерација спремила и хуманитарна помош и сака да обезбеди сигурност за целата одбојкарска заедница во Иран.
„Секунди по ракетниот напад, прозорите се разлетаа во илјадници парчиња. Спортската опрема, топки, табли, огради се разлетаа низ воздухот. Црн чад го исполни местото. Не се дишеше од мирис на чад. Се слушаа врискотници помешани со звук на рушење и паѓање на плафонот“, рекол 29-годишниот Мохамед Саед Хоршеди, вработен во салата кој го сведочел нападот.
Иранската „Црвена полумесечина“ соопшти дека во нападите на здружената коалиција САД-Израел загинале повеќе од 200 лица досега и повредени се повеќе од 750 лица. Организацијата има повеќе од 220 тима на терен за да помага во расчистување на гранатираните објекти и спасување повредени лица.

извор