Сан Антонио во серија порази, Атланта рутински

Атланта Хокс го совлада Далас Маверикс 104:87 и така го запиша 45. триумф во сезоната, а втор по ред на домашен терен. Најзаслужен за триумфот беше сè подобриот Германец Денис Шродер со 17 поени. Кајл Корвер уфрли 16 поени.

Перо Антиќ одигра 17 минути, но не успеа ниту еднаш да се запише во листата на стрелци. Перо имаше 0/3 за три поени, два скока, една асистенција и една загубена топка. Кај Маверикси, кој играа без суспендираниот Ражон Рондо (се скара со тренерот на Мавси), најефикасен беше Монта Елис со 19 поени.

Актуелниот шампион Сан Антонио го доживеа четвртиот последователен пораз, откако синоќа загуби во Портланд 111:95. Вес Метјус уфрли 31 поен, а голема поддршка имаше и од Олдриџ кој додаде 11 поени со 13 скокови. Ова беше прва победа за Портланд после Ол Стар вечерта и четврти пораз за Сан Антонио.

Треј Блејзерси погодија 13 од 26 обиди за тројка и успеа да ја сочува предноста дури и кога Спарси намалија на -4 пред финишот.

Во „Тарџет центарот" во Минеаполис, после осум години се врати Кевин Гарнет, легендата на Минесота, франшиза за која играше цели 12 години. Вечерта беше предодредена за неговото враќање, кој во својата сала беше пречекан со овации.

Волците му вратија на КГ со победа над Вашингтон 97:77, а Гарнет за 19 минути уфрли пет поени, осум скока и две блокади. Најефикасен беше Кевин Мартин со 28 поени, Никола Пековиќ запиша 15 погодоци и 13 скокови.