Очигледна беше желбата кај кошаркарите на МЗТ Скопје триумфално да ја стартуваат новата година во АБА лигата и да останат во горниот дел од табелата во друштво на првите седум екипи. Тоа го најавија уште во воведните 10 минути во кои се наметнаа веднаш како фаворити и поведоа со 19:11.
Во вториот период имаа постојана едноцифрена предност која изнесуваше најмногу +9, но во последните минути од првото полувреме имаа проблеми во играта и потрошија многу топки во обидот за три поени каде имаа слаба реализација 4/13.
Најиндиспонирано во првиот дел делуваше Дамјан Стојановски кој погоди 1/5 во обидите за три поени, а по слабата реализација во втората четвртина „Металците" имаа само четири поени предност на полувремето од 35:31.
МЗТ ја подобри играта во третиот период во кој го одржа водството кое најмногу изнесуваше +11, но на стартот од последната четвртина кошаркарите на Шолнок стигнаа до -3. По брзата серија од 9:0 тимот од Аеродром повеќе не дозволи да се доближат гостите и на крајот триумфираа со 73:63.
Зоран Мартин неочекувано им даде помала шанса на домашните играчи Гечевски, Чековски и Стојановски кои се носители во играта на македонскиот шампион, а за сметка на тоа ги пушти во игра повеќе странските кошаркари.
Голема минутажа уште на деби мечот добија двете најнови засилувања Сеад Шеховиќ кој беше најпрецизен на мечот со 18 поени и Александар Цветковиќ кој постигна 10 коша. Третиот кошаркар со двоцифрен број на поени беше Маринковиќ кој додаде 11 поени.
