Првата сезона на Фил Џексон како претседател на тимот од Медисон Сквер Гарден стана фијаско од историски размери. Никси се заложници на кризата на која не ѝ се гледа крајот: 27 порази на 32 натпревари, (најмногу во НБА после Филаделфија), најлошиот учинок на франшизата од нејзиното постоење. Против Портланд синоќа Никси го претрпеа осмиот пораз по ред, 101:79.
Њујорк Никс не освоиле титула во НБА повеќе од 40 години. „Навивачите умираат, ние умираме“, изјави Мело Ентони после поразот од Вашингтон за Божиќ. Истиот Кармело Ентони дава 110% од своите можности за да ја поправи ситуацијата во Њујорк. И покрај повредата на левото колено, Кармело нема намера да се предаде, а против Портланд синоќа одигра 19 минути, имаше 13 поени и 5 скока.
„Физички не сум баш најдобар. Не можам да предвидам што ќе се случува, но телото ми кажува дека треба да одморам. Одам ден по ден, натпревар по натпревар и давам сè од себе кога излегувам на теренот. Ако ги немавме сите овие повредени играчи, можеби ќе застанев. Но кога ќе се свртам околу и ќе го видам Џ.Р. Смит во цивилка, Иман Шамперт во одело и сите други повредени во публиката, тешко можам да го оставам тимот на цедило“, изјави Кармело Ентони после поразот од Портланд синоќа.
Кармело летово потпиша нов, 5-годишен договор со Њујорк Никс вреден 124 милиони евра и ако го немаа во ростерот, Никси дефинитивно ќе ја архивираа сезонава како најлоша во нивната историја. Триаголникот во играта, на кој упорно инсистираат Фил Џексон и тренерот Дерек Фишер ниту еднаш не се покажа како прав систем за актуелниот состав.
Во моментов повредени играчи во Њујорк се Андреа Барњани, Иман Шамперт, Амари Стадемаер, Клеантони Ерли и казнетиот Квинси Ејси. Никси се претпоследни на Истокот со 28 порази и само 5 победи сезонава. Следниот натпревар го играат против ЛА Клиперс на 1-ви јануари.
Резултати НБА:
ЛА лејкерс – Феникс 107-116
Портланд – Њујорк 101-79
Денвер – Торонто 102-116
Далас – Оклахома 112-107
Сан Антонио – Хјустон 110-106
Кливленд – Детроит 80-103
