Легендарниот босански тренер доживеа овации во австрискиот град Грац, место каде се прослави со својата тренерска и пред сè човечна умешност.
Во пресрет на мечот од 35. коло на австриската лига меѓу Штурм Грац и Матерсбург, на стадионот се појави и Ивица Осим, поранешен тренер на Штурм а навивачите и клубот му приредија убав дочек за 75-от роденден.
За тоа колку го сакаат и почитуваат Австријците покажуваат коментарите на официјалната Фејсбук страница на Штурм: „Тоа што Осим го направи овде беше невозможно“, „Никој никогаш не направил колку што направи Ивица“, „Среќен роденден легендо. Те сакаме Иване“. Неговото право име е Иван.
А што направи Осим со Штурм Грац?
Дури три сезони по ред ги внесуваше во групната фаза на Лигата на шампионите, нешто што денес е тотално нереално и невозможно. Во елитата, Штурм играше во сезоните 1998/1999, 1999/2000, 2000/2001 и Австријците под диригентска палка на Штраус од Грбавица не беа топовска храна на големите екипи.
Во третата сезона го освоија првото место пред Глазгов Ренџерс, Галатасарај и Монако. Подоцна испаднаа во втората фаза на ова натпреварување во конкуренија на Манчестер Јунајтед и Валенсија која стигна до финалето.
