Најлудиот момент во Премиер викендов - голманот Фостер и шансата за гол

Мечот Вотфорд - Челси (1:2) помина во апсолутна доминација на гостите, кои уште еднаш покажаа дека со децата од своја школа играат убав фудбал. Дадоа два гола, можеа уште два, ама на крај се спасуваа.

Во 77’ минута Жоржињо го удри Жерар Делафеу по нога и судијата досуди пенал. После голот за намалување на резултат 1:2, домаќините живнаа, заиграа многу поагресивно и тргнаа по бод.

Во 96’ минута Мејсон Маунт направи фаул близу голот на Челси. Во шеснаесетникот дојде и некогашниот англиски репрезентативен голман Бен Фостер, кој е многу повисок и поголем од своите соиграчи.

Делафеу центрираше, некој од играчите на Вотфорд само ја чепна топката а голманот Фостер во скок со глава го продолжи ударот до подалечниот агол, но голманот на Челси реагираше неверојатно и ја изби топката далеку од својот гол.

На тој начин Кепа Аризабалага спаси чист гол, а Бен Фостер за малку ќе станеше јунак на колото. Веднаш потоа мечот заврши и Фостер отиде да му честита на Кепа.

Бен Фостер има 15-годишно искуство во Премиер лигата. Тој беше воодушевен од колегата на другата страна:

„Никогаш не сум дал гол, а на овој меч бев близу како никогаш досега. Но чесно е и да се признае дека Кепа направи чудесна одбрана. Во тој момент просто ги затворив очите и чекав да видам што ќе биде. Ако дадев гол можеби ќе ја завршев кариерата“, изјавил Фостер.