Лацио ја совлада Монца со 0:2, првиот гол го постигна ветеранот Педро, а вториот е дело на Сергеј Милинковиќ Савиќ кој го урна рекордерот на Горан Пандев на листата на најдобри стрелци меѓу странците.
За српскиот ас ова е гол број 65 во дресот на Лацио, а Пандев има 64 и од 2009-та беше на врвот меѓу странците. Трет е Мирослав Клосе со 63.
Инаку со овој гол, Милинковиќ се искачи на 10-та позиција на вечната листа на стрелци, каде лидер е неприкосновениот Чиро Имобиле со 193 погодоци.
СМС и Пандев имаат повеќе постигнати голови не само од легенда како Клосе, туку зад нив се и имиња како Казираги, Инѕаги, Недвед, Креспо, Салас...
Српскиот репрезентативец сезонава има 5 гола и 8 асистенции во Серија А и плус 2 во Лига Европа.
Инаку Лацио е во одлична серија од 5 победи и едно реми и со 19 примени голови ја има втората најдобра одбрана во топ 5 лигите во Европа заедно со Њукасл и Атлетико. Само Барса е поцврста од нив со 9 примени голови.
На гостувањето против Монца рекорд одбележа и голманот Проведел со 17 меча без примен гол, нешто што не му успеало на никој кај бјанкочелестите, па дури ни кај Маркеџани и Перуци.
На 10 кола до крај во Серија А, трката за ЛШ ќе биде пеколно тешка и неизвесна. Јувентус е на -6 до четвртата позиција, што значи шест екипи се во битка за трите позиции.
