Челниците на Фудбалската асоцијација на Англија денес со огромен оптимизам за нов селектор на репрезентацијата го претставија човекот кој во својата тренерска кариера има забележано успех само во клупски фудбал во Шведска и Данска.
Рој Хоџсон и официјално е селектор на Англија. Тој со Фудбалската асоцијација потпиша договор со траење од четири години, но преостанува да видиме колку долго ќе се задржи на жешката селекторска фотелја.
Хоџсон стартуваше со огромен оптимизам и веќе најави дека ќе атакува на освојување на Европското првенство. Оптимисти се и Англичаните. Тој е единствениот Англичанец со интернационално искуство кој ја предводел нивната репрезентација.
Но кое е неговото искуство и неговите успеси?
64-годишниот стратег во својата кариера има предводено 15 клубови и три репрезентации, а единствените успеси му се од првенствата на Шведска и Данска кога ги предводел Халмштад, Малме и Копенхаген. Со екипите на Интер и Фулам има стигнато до финалињата на УЕФА Купот и Европа Лигата.
Кариерата на Хоџсон низ фотографии:
Хоџсон ја започна тренерската кариера во шведскиот клуб Халмштад каде се задржа пет години и ги освои титулите во 1976 и 1979
Во 1988 ја освои титулата во Шведска со Малме
Хоџсон ја одведе Швајцарија до Светското првенство во 1994 и беа елиминирани во осминафиналето
Во 1997 со Интер беше поразен на пенали од Шалке во финалето на УЕФА Купот
Во 1998 со Блекбурн заврши на 6-та позиција во Премиер лигата, но веќе следната сезона беше отпуштен откако по 14 кола со само 9 поени Блекбурн беше убедливо последен
Во 2001 ја освои титулата во Данска со ФК Копенхаген
По неуспесите со Удинезе и репрезентацијата на Обединетите Арапски Емирати, во 2005 стана селектор на Финска, но си поднесе оставка во 2007 откако не успеа да избори пласман на ЕУРО 2008
Во 2010 повторно беше близу до успех, но загуби со 2:1 во финалето на Лига Европа од Атлетико Мадрид
Хоџсон доби шанса да предводи голем клуб во Англија, но по само 191 ден тој го напушти Ливерпул и остана запаметен како еден од најлошите тренери во историјата на клубот
Во февруари 2011 беше ангажиран како тренер на Вест Бромвич Албион и минатата сезона заврши на 11-та позиција.
