Сепак, има луѓе што одлучуваат токму другарството да го стават во центар и местото во нивниот живот што треба да го држи партнерот - го држи другар или другарка. Со другар/ка купуваат куќа, растат деца, имаат заеднички сметки во банка и си се први на список при несреќа или правен проблем. Ваквите односи дури знаат да ги имаат и проблемите на еден брак, минус сексот.
И покрај очигледната посветеност, термин за оваа појава нема. Првата што ти паѓа на памет - best friend - како да не е доволна да се опише што тие другари имаат, па луѓето посегнуваат по аналогии. Некои велат дека се како браќа/сестри, други како романтични партнери. Некои се фаќаат и за двете асоцијации. Овие пријателства не доаѓаат со претходно „напишано сценарио“ за како треба односот да изгледа и да прогресира, а со тоа и остануваат нејасни за луѓето однадвор.
Но, како „интимни пријателства“, не биле секогаш чудни за околината. Во периодот од 18. до 20. век, често се среќавал терминот „романтично пријателство“, каде што жените си пишувале писма меѓу себе и се нарекувале „љубов моја“ или „кралице моја“ и правеле албуми за пријателство со страници и страници стихови. Авторки креирале дела што се движеле околу оваа појава, како Дајана Виктрикс, во чиј роман, ликот Енид одбива брак затоа што додворувачот би го зафатил местото што веќе го држи нејзината другарка. Му вели:
„Ако се венчаме, ти би морал да бидеш прв. А, не би можел, затоа што таа е прва.“
За овие одамна поминати времиња, се поставува едно прашање: Дали сепак имале секс? Од она што е запишано, изгледа дека не. Можеби некои од нив го користеле тоа „романтично пријателство“ како маска за љубовна или еротска врска, за некои од нив постојат и сомнежи, но во повеќето случаи, историчарите не можат со сигурност да тврдат што се случувало зад затворени врати. И без разлика што нема да дознаеме, јасно е дека нормите за што едно другарство претставува се менувале низ историјата.
„Истополовите другарства“ од овој тип биле можни и поради социо-економските услови. Мажите и жените во 19-от век се движеле во различни социјални сфери, па не било баш шокантно да формираат длабока поврзаност со некој од нивниот пол.
Не се снаоѓа секој со платонско партнерство (како што важи и за романтично), и без разлика што може си во потрага по таков другар, не значи дека лесно ќе го најдеш. А сепак, некои од тие што го нашле, си го споредуваат животот со торта - дечковци девојки, сопрузи и сопруги се само шлаг на тортата.
Тортата се самите тие - и нивното другарство.
