Со оглед на времето што го поминуваме онлајн, можеби е и логично виртуелниот свет е сè повеќе место каде што самоповредувачите одат да си наштетат. Сепак, зошто? Што тера една млада личност да става пораки на сопствените профили на социјалните мрежи, нарекувајќи се „дебел/а, бескорисен/на“ или уште пострашно, „патетичен/на си и не заслужуваш да живееш“?
Некои од тинејџерите тврдат дека го направиле тоа за да бидат смешни или да привлечат внимание. Да тестираат дали некој навистина им е пријател. Но, значителен процент признава и дека ова доаѓа од ниска самодоверба или омраза кон себе.
Со пораста на „тролањето“, доксингот и сајбер-насилството, бизарно е што тие што најмногу ги цениме во општеството, се најчесто и мета на највеќе онлајн напади. Кога луѓето ѝ пишуваа на Ријана дека е дебела, таа врати со меме од типот „Ако не можете да се справите со мене кога ми е најлошо, тогаш не ме заслужувате ни кога ми е најдобро.“ Пинк напиша емотивна порака кога боди-шејмери ја исмеваа и неа. Тие што јавно одговараат добиваат виртуелни аплаузи.
Постоиме во економија на внимание: колку погласно и подрско се однесуваш, толку си поуспешен, имаш повеќе лајкови, моќ и афирмација. Дали тогаш е изненадување што некои деца што се чувствуваат заборавени и невидливи, сакаат да создадат илузија дека имаат „хејтери“? Сепак, иако дигиталното самоповредување изгледа побезопасно од неговата физичка алтернатива, болката често се пренесува во вистинскиот живот.
Неодамнешниот тренд за копање по стари, проблематични твитови на славните пред да станат славни илустрира дека она што го кажуваме онлајн, дури и кога е пред 10 години е секогаш таму, испечатено во вортексот на интернет кодовите. И дури и кога телата физички ќе умрат, Фејсбук профилите остануваат. Тогаш. што избледува побрзо? Рана што крвари, или дигитален код? Одговорот тешко се добива.
На темава, д-р Марк Буш, директор за политики и докази во Young Minds инсистира:
„Ако се чувствувате лошо, или добиете желба да се повредите, или да се казните, важно е да дојдете до некој кому му верувате. Може да е пријател, роднина, наставник, доктор, советник, дури и СОС телефон. Не сте сами и не морате да страдате во тишина.“
