Прво, сте лепеле ли нокти со лепакот што е предвиден за тоа? За да не ти падне ноктот на првата квака, тоа чудо треба да биде доста силно. Најверојатно и доаѓа со предупредување да се држи подалеку од очи.
На една девојка од Англија не само што не ѝ го држеле подалеку од очи, туку и надградба на трепки ѝ направиле со него.
Значи секогаш, ама секогаш треба човек да истражи и да се распраша околу нов салон за вакви работи.
Меган Риксон, 20-годишна студентка од Лутон, Бедфордшајр закажала за надградба во неименуван салон и додека траел третманот - прво ја печело, па ослепела на некој саат.
За Базфид изјавува:
„Ме печеа очите многу, но таа ми рече ‘не се секирај, нормално е’, и ми рече да го држам окото отворено. Печеше толку многу што сами ми се затвораа, а таа упорно ми велеше да ги држам отворени. Кога заврши, седнав на креветот и не можев да ги отворам. Реков дека не е нормално, но таа ми рече дека е.”
Ова е далеку поразлично од расправање со продавачка дали е Мошино или Москино, затоа што, без разлика што некој вика 'Мошино', нема да ослепи поради тоа.
Под видеото што го објави од очите (и солзите, и црвенилото), Риксон ги предупредува сите што тргнале по трајни вештачки трепки да внимаваат. А ние ве предупредуваме да се спремите за солзење ако го пуштите ова:
Girls be very very careful where you get your eyelashes done!!I got my individuals done today somewhere new and it turns out they used nail glue on my lashes. I genuinely lost my sight for 2 hours. Thankfully the swelling has gone down, but there still very sore. Be careful😭 pic.twitter.com/NmsFr9QSbk
— Megan Rixson (@MeganRixson) October 19, 2018
„Јас ставав индивидуални денес и излезе дека ми ставиле лепак за нокти. Најозбилно не гледав два часа. За среќа, отокот се намали, ама уште ме болат. Внимавајте.”
Наредниот ден се вратила со дечко ѝ во салонот за да праша „што вака.” Кога дечко ѝ прашал каков лепак користеле, вработената рекла „лепак за нокти!” Не е познато со каква интонација. Дали била друга, па била изненадена, или била истата и не ѝ било прв пат.
Како и да е, не се бутајте по подруми, еднаш веќе дискутиравме дека ништо добро нема во комбинацијата убавина и подрум.