Додека индустријата паничи обидувајќи се да ги „разбере младите“, истражувањата покажуваат дека е можно малку да претеравме. Секогаш на генерализација треба да се пристапи внимателно, односно да се сфати дека се работи за луѓе што можеби делат некоја ознака, но не и животни фази, интереси и потреби. А сепак, маркетингот со години ги третира како хомогена маса.
Некои истражувања покажуваат дека дури 78% од рекламите прикажуваат барем еден ЏенЗи, а 50% ги ставаат и во средината на приказната, трудејќи се да им го привлечат вниманието. А сепак, парадоксот е што таа генерација најлошо реагира кога ќе се препознае себеси во реклама - едно тестирање со над 19.000 испитаници покажува дека „зумерите“ покажуваат помала емотивна поврзаност со ликот во рекламата од било која друга група.
Темите не се проблем - ти можеш да изработиш реклама поврзана со ментално здравје - и нив ќе ги интересира ментално здравје - само што при третманот на целната публика и претераниот труд, рекламите често завршуваат како излижан, исфорсиран обид брендовите со сила да ѝ се допаднат на таа генерација. Со други зборови - секој втор бренд денес ги прашува „ти се свиѓам ли?“
Истражување на System1 покажува дека најуспешните реклами не се оние со најмногу кликови, туку оние што предизвикуваат емоции. Наместо алгоритми, методологијата ја засноваат на човечки реакции и три показатели: Star (долгорочен раст на брендот), Spike (краткорочен ефект на продажба) и Fluency (колку брзо луѓето ја поврзуваат рекламата со брендот).
Реклами без мобилни телефони, вештачка интелигенција и скролање постигнуваат подобар одзив кај зумери - значи дигиталната генерација подобро реагира на човечки приказни, блискост и хумор. Иако само 26% од рекламите со зумерски ликови користат хумор, токму тие создаваат најсилна емоционална врска.
Жените и мажите во оваа генерација реагираат различно - жените повеќе на теми за самодоверба и еднаквост, мажите на благодарност и заедништво - но за двете групи клучниот збор е автентичност. Тие не сакаат совршено произведени пораки, туку оние што изгледаат како реален живот.
И покрај сите нови платформи и трендови, старите маркетинг правила сè уште важат - најважно е да се разбере вистинската публика, а не да се следат генерациски клишеа. На крајот, Генерација З, колку и да изгледа дигитално, се движи од истите универзални емоции како сите ние - топлина, блискост, хумор и човечност.
