Интернетот нонстоп лаже. Твојата неволност да губиш време на фризер и некој да ти ја фаќа косата кога-тогаш ќе те однесе на Јутјуб, да провериш дали си бар малку способна да заличиш на човек со сопствени напори. Таму, 764-то видео со успешна фризура на некоја што има 764 илјади следачи, и сака да те убеди дека „ти требаат само пет минути, фигаро и четка”.
Шеесет и пет минути покасно, после 20 пати враќање на потезите, на екранот има една бјути влогерка со фризура како од салон, а кај тебе во огледало има едно нешто што благо потсеќа на возрасна жена што на глава има јазовец уштекан во струја.
Па, нели истите чекори?
