Додека ние се мачиме еден конец да протнеме во игла за да закрпиме нешто од преизносените карантински work-from-home униформи (читај: пижами), Алтеа Кром плете минијатурни и микро-мини џемпери што само бубамари би можеле да ги носат. Поточно, величините би му дошле - од XS (бубамара), до XL (глушец). Не, не е инклузивно и нема за стаорци.
И како да не е доволно тешко да сплетеш ролка од 5 милиметри, Кром се труди (и успева!) и околу дизајнот - уметнички симболи инспирирани од разни култури и временски периоди; од келтски јазли до Поп Арт, од египетска митологија, до грчки амфори.
Користи тенки свилени конци и игли од хируршка жица. На нејзиниот сајт пишува дека некогаш се едвај 0,2 милиметри. Инспирација влече од Енди Ворхол, јапонско кимоно, грди празнични џемпери, карти, Пикасо и класична „рибарска плетка“.
Повеќето парчиња (парченца?) се од 5 мм до 1 цм и можат дури и онлајн да се купат, во случај да им е ладно на комарците што ве јадат. Цените достигнуваат и над 1000 долари, со оглед на тоа за каква интензивна работа и посветеност станува збор. Има и нешто што се вика „мини минијатурни џемпери“ (колку може да биде помало?!) и имаат уникатен извор на инспирација.
„Овие почнав да ги плетам за Олимпијадата во 2004“, вели таа. „Бев особено инспирирана од спортистите и нивната желба да си ја тестираат физичката и емотивната граница. Многу од нив своеволно се бореа низ речиси неподнослив физички напор за да одговорат на прашањето што произлегува од една универзална љубопитност: „Колку брзо, колку долго и колку далеку можеш да одиш?“
Па, можеш. На пример, може да ти се видат џемперите „некако големи“, па да се префрлиш на чорапи:
Па, можат и чорапите да ти се видат лесни, па одиш на РАКАВИЦИ:
Па, уште внимавано на детали:
...
