Почетоците на митот за вампири се 800 години пред имагинацијата на Брам Стокер да го роди ликот Дракула, кој со Влад Тепеш или Дракула III очигледно дели само име. И од кај доаѓаат?
Од кај нас. Доаѓаат од кај нас, од словенски фолклор, од Балкан. А на запад почнуваат да се шират заради Србија и нејзината заробеност меѓу две огромни сили - Хапсбуршка монархија и Отоманска империја. Странските војници и административци забележале чудни ритуали при погребите и за сите известиле дома. А за сите причини поради кои лудите балканци закопувале лук, мак, палеле и боделе недолжни лешеви имало совршено добро научно објаснување: по смртта телата отекуваат од гасови, може да крвари и устата, па телото личи како да било живо и се хранело неодамна.
Пратиле и доктор да испита, и без разлика што вратил извештај каде што сето тоа го демистифицирал, фантастичните приказни веќе си имале фатено свој пат. И стигнале до Брам Стокер, човек што до својата 7-ма година бил врзан за кревет и слушал страшни народни приказни од мајка му.
