Десетина години нас нè забавуваат социјалните мрежи. За разлика од нивните колеги во Холивуд, овие креатори се мачат да бидат сериозно сфатени како дел од забавната индустрија и како вредни за основни работнички права и заштити. Платформите им се каприциозни или незаинтересирани, па се појавуваат иницијативи за колективна организација.
Проценките се дека креаторската, инфлуенсерска економија до 2027 ќе се дуплира и дека вредноста од 250 милијарди долари ќе ѝ се качи на 500 милијарди. Најјаките 50 креатори заедно имаат 2,6 милијарди следачи и имаат заработено 700 милиони долари - меѓу нив и Мистер Бист и Бејли Саријан кои сепак се исклучоци, не и правило во инфлуенсерскиот свет. Само 4% заработуваат над 100.000 долари годишно, но сепак има и креатори чии кариери се базираат на скромен број следачи.
Токму последниве се најранливи на промените на политиките и алгоритмите на платформите - една платформа може да понуди бизнис можности, но истовремено и да ги смени политиките на функционирање. Така Твич направи некои стримери кои задржуваа 70% од заработката, одеднаш да задржуваат 50%.
Од август годинава постои Здружение на креатори на Америка, како замена за Здружението на креатори на интернет (што се затвори во 2019). Парадоксот е дека новово се опишува како организација за професионални услуги, наместо синдикат, а сепак тврди дека нуди бенефиции слични на синдикатите. Постои и Дискорд група од ТикТок креатори каде што се дискутира синдикализирање, има и на Твич. На тие од Твич веќе изгледа им се исплати: Во јуни годинава, компанијата капитулираше откако главните стримери се заканија дека ќе си одат.
Сепак, ниедна од овие иницијативи го нема правниот статус на Writers Guild of America. И покрај напорите, технолошките гиганти одбиваат да ги препознаат инфлуенсерските организации. Кога се создаде сојуз на Јутјубери во Германија, Јутјуб одби да преговара со нив. И повеќето влади не даваат поддршка, ниту ги препознаваат правата на креаторите на содржини. Во Америка „едвај постојат“ во официјални документи, а само една комисија има воведено регулирање поврзано со нивната работа, околу рекламирање и спонозрирани содржини.
Успехот на холивудскиот штрајк може да е само почеток на поголемо глобално движење за правата на инфлуенсерите. Но, за да може оваа нова класа на работници да влезе да ги остави комплетните економски и човекови права сепак може, како во Ајкула, „да ни треба поголем брод“, поточно - многу поголем напор, организација и упорност.
