Талибанската влада во Авганистан на тамошните универзитети им забрани да користат книги чии автори се жени, како дел од новиот закон кој исто така забранува и учење за човекови права и спомнување сексуално злоставување.
Зиаур Рахман Арјуби, заменик-академски директор на Министерството за високо образование на талибанската влада, во писмо до универзитетите рече дека одлуките ги донел „панел на верски ученици и експерти“.
Околу 140 книги напишани од жени - вклучувајќи и наслови како „Безбедност во хемиска лабораторија“ - се најдоа меѓу 680-те книги што талибанските експерти за литература ги сметаат за проблематични поради неусогласеност со шеријатскиот закон кој во Авганистан е на сила од пред 4 години.
Со цел да се спречи неморалност, оптичкиот интернет е забранет во најмалку десет покраини, а уште од претходно на женските деца им е забрането школување после шесто одделение. Вкупно 18 предмети, главно општествени се забранети во школи и универзитети.
Поранешната министерка која беше на позиција пред да преземат талибанците - Закија Адели не е ни изненадена од новиот развој на настаните.
„Со оглед на тоа што направија во последните четири години, не беше нереално да се очекува дека ќе наметнат промени во наставниот план и програма,“ вели таа. „Со оглед на мизогиниот начин на размислување и политиката на талибанците, сосема е прородно кога на самите жени не им се дозволува ни студирање, нивните ставови, идеи и написи да се поттиснат.“
Претставниците на авганистанската влада пак инсистираат дека „почитуваат женски права“, ама само „во согласност со верските обичаи и законот“.
