„Фантомската кочија“ - врвна хорор-технологија во 1921

И над сто години по неговото појавување, „Фантомската кочија“ (The Phantom Carriage, 1921) на Виктор Шестрем сè уште ја носи истата магија што ги има воодушевено и Чарли Чаплин и Ингмар Бергман. Чаплин го нарекол „најдобриот филм што некогаш е снимен“, а Бергман „едно од апсолутните ремек-дела во историјата на филмот“.

Создаден во ерата на немиот филм, „Фантомската кочија“ ја надминал својата техничка и уметничка епоха. Во време кога специјалните ефекти се правеле со рачна прецизност, кинематографот Јулиус Јансон користел двојни експозиции за да ја прикаже средбата меѓу светот на живите и мртвите - визуелен подвиг што и денес изгледа неверојатно.

Филмот раскажува приказна која почнува на полноќ, во мигот кога часовникот го означува крајот на старата година. Главниот лик, кој го игра самиот Шестрем, умира токму тогаш и е осуден цела година да ја вози кочијата на смртта, во едно симболично патување низ вината, казната и можноста за искупување.

Приказната е инспирирана од истоимената новела на Селма Лагерлеф, првата жена која ја добила Нобеловата награда за литература. Како и нејзините дела, и филмот ја носи таа мешавина на морална длабочина и скандинавска мистичност.

Освен што е куриозитет, „Фантомската кочија“ е приказна за смртта и тежината на минатите постапки. Токму таа комбинација на техничка иновативност и психолошка комплексност го прави класик.

Го има цел на Јутјуб.

објавено: 4 ноември 2025 - 00:00