Најновиот дискурс кај десничарските медиуми забележува „криза на машкост“ во САД, со акцент на „сè пониските нивоа на тестостерон“ и тенденцијата на левицата да ја „деконструира традиционалната машкост“. Во овој наратив влегуваат и статистиките дека мажите почесто умираат од дрога, алкохол и самоубиство, а и реалноста дека традиционалните вредности на машкоста како финансиската независност и сопствеништвото на недвижнини се сè понедостижни.
Истражувањето на психологот Адам Станаланд испитува како се манифестира таа машка анксиозност, особено меѓу младите мажи и адолесцентните момчиња. Дури и благи предизвици за машкоста, како на пример, кажување дека некој е помалку машко од просекот, може да предизвика агресија кај мажите на возраст од 18-40 години. Истражување објавено во 2024 истражува кога точно се појавува оваа анксиозност кај момчиња во ран и доцен пубертет, и наодите велат дека машки во доцен пубертет, особено тие што доаѓаат од тешки социоекономски услови, реагираат агресивно на она што им се чини како закана по нивната машкост. Овие деца обично доаѓале од родители што одобрувале хегемонистичка машкост, односно, ја поврзувале со моќ и доминација, а и живееле во делови од САД каде што преовладувала поддршка за Трамп во 2020 година.
Економската несигурност е големо влијание во овие случаи. Родителите што биле под финансиски стрес често се држеле до ригидни родови норми, што пак ги оформило гледиштата на нивните синови околу машкоста. Ова се совпаѓа со други истражувања кои покажуваат дека економските потешкотии ги засилуваат социјалните стереотипи и хиерархии.
Ова носи значителни политички импликации - сè поизразената анксиозност поврзана со машкоста, заедно со економска несигурност влијае на младите машки гласачи, особено тие што доаѓаат од работничката класа, па фигури како Трамп имаат бенефит од нив, проектирајќи силни, доминантни појави, што пак на младите мажи им изгледа како вистинско решениe за справување со притисокот да се вклопат во традиционалните машки идеали.
Истражувањето го осветлува упорното влијание на општествените и економските притисоци на машкоста, што ги предизвикува претпоставките за прогресивните вредности на помладите генерации. Решението е остварливо, но сепак тешко - потребни се системски промени што би ги олесниле тие несигурности на економско и социјално ниво.
