„Да видев вакво тело на насловна кога бев помала, ќе ми се променеше животот!” твита Тес Холидеј, притоа споделувајќи го нејзиниот најнов успех - насловна страница на Космополитен, списание кое со години наназад става слаби, класични манекенски типови на истото место, а тие што се на граница ги фотошопира за да изгледаат послаби.
Твитер, полудува од среќа и превираат коментари на луѓе што тврдат дека апансас почнале да плачат со солзи радосници дека конечно светот се менува и луѓе што „изгледаат нормално” се конечно претставени во гламурозно светло, плус дека многу млади девојчиња ќе сфатат дека и нивното, наводно несовршеното и дебелото е сепак совршено.
Ама Тес Холидеј не е Ешли Греам.
Тес Холидеј има 130 кила и метро и шеесет. Не е проблем што е така, затоа што на крај сè се сведува на „она си знае.”
Проблемот е што Космополитен, а и една огромна група на луѓе сака да го прикаже тоа како нешто позитивно. А огромна е разликата меѓу промовирање „боди позитивити” и промовирање гојазност.
Природно, се појавија и коментари за ова - луѓето почнуваат да молат да не се радуваме дека некој е нездраво дебел, дека изгубиле членови на семејството баш поради овој проблем и дека ова тело нема врска со непривлечност. Има врска со нездравост.
Никол Арбор, Јутјуберка што го сврте светот наопачки со нејзиното видео „Dear Fat People” го срочи тоа вака:
„На страна нивната машинерија за лажни вести каде што фактите не се битни, а зборовите на славните личности се извртуваат за да се направи драма… Ова е апсолутна бесмислица.
Боди позитивити значи да бидеш позитивно настроен кон своето тело со јадење здрава храна и вежбање. Насловнава е велелепно срање.
Ова е гојазност, симптом на подлабок проблем и не треба да се промовира. Ако не па, ставете пушач на насловна, со игли во рацете затоа што штетење на себеси и зависност е штетење на себеси и зависност.
Но, списанието што се преправа дека ова е за жените, има совети за брзо слабеење внатре и сепак ја промовира оваа жена САМО заради нејзиното тело. Ја користат за пи-ар.
И ќе бидам многу јасна, радувајте се и гордејте со себе колкави и да сте (затоа што ние сме повеќе од нашите тела) и бидете јаки и со стрии или што и да ви се чини како несовршеност. Но ако активно предизвикувате штета на вашето тело… Тоа не е за гордеење и Космо, списанието за рушење на вредноста на жените, не може да ме убеди во спротивното.”
Јадете, уживајте и радувајте се.
Ама да не се правиме глупи.
