- Спасувачките операции во седумте запалени кули во Хонг Конг завршија, откако пожарникарите заклучија дека повеќе нема шанси да пронајдат преживеани луѓе два дена откако избувна пожарот.
- Потврдена е смртта на 128 луѓе, а уште околу 200 се сметаат за исчезнати. Повеќето од жртвите биле во двете кули што пламнале први.
- Пожарот зафати седум од осумте кули во блокот со околу 2.000 станови и повеќе од 4.600 жители. Спасувачките напори биле концентрирани кон станари што по телефон барале помош. Повиците вчера стивнале.
- Не се познати причините зошто избувнал пожарот, но брзо се проширил поради скелињата од бамбус, покриени со платно и стиропор, заради реновирање на фасадата што траело со години. Уапсени се три лица од компанијата одговорна за реновирањето.
- „Нема закон што пропишува дека мора да се користат материјали отпорни на пламен. Тоа е само наведено во кодексите на Министерството за труд. Не се почитуваат барањата бидејќи сè е легално“, вели Ли Квонг-синг, претседател на Хонгконгшкиот институт за безбедност.
- Иран формира нова дигитална платформа за осигурување „Ормуз сејф“, како ново владино тело за управување со бродскиот сообраќај низ Ормускиот проток. Платформата ќе се потпира на плаќања со криптовалути.
- Според планот на Министерството за економија, управувањето со теснецот преку рамка за осигурување би овозможило издавање на разни полиси за поморско осигурување, како и сертификати за финансиска одговорност, наместо да се наплаќа „патарина“. При идеални околности, ова би можело да генерира до 10 милијарди долари приходи за Техеран.
- Планот ќе почне со осигурување кое покрива инспекција, задржување и конфискација на бродови. Штетата од воени напади нема да биде покриена.
- „Овој модел би бил прифатлив за другите земји во мирно време, а сепак би му дозволил на Иран да врши контрола врз теснецот“, објави државната новинска агенција Фарс.
- Молдавските лидери ја осудија како „закана“ одлуката на Владимир Путин да го поедностави процесот на давање руско државјанство на жителите на регионот Придњестровие, кој се отцепи од Молдавија пред 36 години.
- Една половина од жителите на Придњестровие веќе имаат руско државјанство. Декретот на Путин објавен во петокот им овозможува на уште 350.000 луѓе да добијат руски пасоши без да го исполнат условот за постојан престој во Русија.
- „Ова е начин повторно да ни се закануваат, бидејќи на Русија не ѝ се допаѓаат нашите акции за реинтеграција. Веројатно им требаат повеќе луѓе за да испратат во војната во Украина“, изјави молдавската претседателка Маја Санду.
- Рускиот амбасадор во Кишињев, Олег Озеров, изјави дека потегот е од хуманитарни причини, во согласност со меѓународното право, поради „зголемениот притисок“ од Молдавија врз Русите. Тој ги оцени реакциите како „лицемерие“, бидејќи Молдавија им дозволува на нејзини граѓани да добиваат романски пасоши.
- Придњестровие се отцепи во 1990 година, кога Молдавија сè уште беше советска република. По двегодишен судир со повеќе од 1.000 жртви, двете страни се во мир, заштитуван од контингент од 1.500 руски војници. Регионот има свои политички институции - парламент, војска, полиција и поштенски систем.
