- Ворен Бафет, веројатно најуспешниот инвеститор на сите времиња, објави дека до крајот на годината ќе се повлече од директорската позиција во неговата компанија „Беркшир Хетавеј“. Кормилото му го предава на потпретседателот Грег Ејбел.
- Со богатство проценето на 154 милијарди долари Бафет сега е четвртиот најбогат човек во светот. Без оглед на тоа, веќе 65 години живее во скромна куќа во Омаха.
- Ги заработил првите пари како шестгодишно дете. Ги купил првите акции на возраст од 11 години. Плаќа даноци 81 година.
- Од пропаднатата текстилна компанија „Беркшир Хетавеј“ создаде инвестициски гигант вреден 1.160 милијарди долари. Поседува повеќе од 60 компании и има пакети акции во Епл, Кока Кола, Банката на Америка и Американ експрес. Вели дека нема да продаде ниту една единствена акција од „БХ“. Сите ќе ги подари.
- Украински дронови лансирани од камиони од руска територија, уништиле повеќе од 40 руски авиони, вклучувајќи и стратегиски бомбардери во четири воздухопловни бази оддалечени и по неколку илјади километри.
- Нападот бил извршен во базите Белаја во Иркутск, Дјагилево во Рјазан, Иваново и Оленја во Мурманск. Уништени се стратегиски бомбардери Ту-95 и Ту-22, од кои обично се лансираат крстосувачки проектили врз Украина, но кои може да носат и нуклеарни проектили.
- Стратегиската воздухопловна флота на Русија е десеткувана. Штетата се проценува на најмалку 2 милијарди долари.
- Украинската воено-разузнавачка агенција СБУ ја планирала операцијата 18 месеци. Руски државјани ги возеле камионите до предвидените локации без да знаат што пренесуваат. Покривот на контејнерот автоматски бил отфрлен и дроновите тргнале кон програмираните цели.
- Целата операција била управувана од далечина. Кога одлетале сите дронови, во контејнерите бил активиран експлозив за самоуништување.
- Администрацијата на Доналд Трамп го прекина федералното финансирање на развој на вакцини против ХИВ, со аргумент дека актуелните пристапи се доволни за борба против вирусот.
- Критичните програми за истражување на ХИВ/СИДА ќе продолжат преку новата агенција - Администрација за здрава Америка, чие формирање го побара министерот за здравство Роберт Ф. Кенеди.
- „Комплексните програми резултираа со сериозно поклопување на напорите. На 27 различни проекти за ХИВ/СИДА се потрошени 7,5 милијарди долари. САД треба да имаат најдобри медицински истражувања во светот. Настојуваме да извлечеме максимален ефект од секој долар од даночните обврзници“, изјави Емили Хилијард, портпаролка на Националните здравствени институти на САД.
- До 19 јуни Администрацијата за храна и лекови на САД се очекува да го одобри лекот ленакапавир за превенција од ХИВ. При клиничките истражувања се покажал стопроцентно ефикасен за спречување трансмисија на вирусот.
