- УНЕСКО ја призна италијанската кујна како „нематеријално светско културно наследство“. Таа е првата национална кујна заштитена од Организацијата на ОН за образование, наука и култура.
- „Тоа е заедничка активност што ја нагласува интимноста со храната, почитување на состојките и споделените моменти околу трпезата... Луѓе од сите возрасти разменуваат рецепти, предлози и приказни, а бабите и дедовците честопати им ги пренесуваат традиционалните јадења на своите внуци“, наведува УНЕСКО.
- Премиерката Џорџа Мелони уште од почетокот на својот мандат активно водеше кампања за признавање на кујната. „За нас Италијанците, кујната е многу повеќе од храна или збирка на рецепти. Таа е култура, традиција, работа и богатство“, изјави денеска Мелони.
- УНЕСКО веќе признава 21 италијанска традиција за нематеријално наследство - од подготвувањето пица во Неапол, до операта и ловот на тартуфи.
- Австралија официјално стана првата земја во која на деца помлади од 16 години им е забранет пристапот до социјални платформи.
- Фејсбук, Инстаграм, Кик, Редит, Снепчет, Тредс, ТикТок, Икс, Јутјуб и Твич ќе се соочат со казна од 49,5 милиони австралиски долари ако не ги избришат сите профили на деца помлади од 16 години. Уште пред забраната ТикТок деактивирал 200.000 профили на австралиски деца.
- „Овие реформи ќе променат животи. На австралиските деца ќе им дозволат да имаат детство. На родителите ќе им овозможат душевен мир. Ќе ја поттикнат глобалната заедница да го следи примерот на Австралија“, објави премиерот Ентони Албанезе.
- Министерката за комуникации Аника Велс предупреди дека децата што ја заобиколуваат забраната ќе бидат фатени, дури и ако користат VPN.
- Не е јасно како платформите ќе ја верификуваат возраста на корисниците. Можно е да побараат валидни документи за идентификација или да користат технологија за проценување на возраста преку анализа на ликот на корисникот.
- Американскиот конгресмен Томас Маси поднесе предлог-закон за повлекување на САД од членството во НАТО, бидејќи оригиналната цел на Алијансата од времето на Студената војна повеќе не се поклопува со националните интереси.
- „НАТО беше создаден за да се спротивстави на Советскиот Сојуз, кој се распадна пред повеќе од 30 години. Оттогаш, учеството на САД ги чинеше даночните обврзници билиони долари и продолжува да го ризикува вклучувањето на САД во странски војни. Америка не треба да биде безбедносен чадор за светот, особено кога богатите земји одбиваат да платат за сопствената одбрана“, наведува Маси.
- Конгресменот забележува дека НАТО од 1999 година ги прекршува ветувањата дадени до советскиот лидер Михаил Горбачов дека Алијансата повеќе нема да се шири кон исток по обединувањето на Германија и колапсот на СССР и Варшавскиот пакт.
- „Главниот интерес на САД во Европа е спречување на појавата на регионален хегемон. Вкупниот воен и економски капацитет на европските членки на НАТО го надминува оној на Русија и е доволна противтежа на потенцијален регионален хегемон без ангажман на САД“, пишува во документот.
