- Украински беспилотни летала длабоко во Русија погодиле пумпна станица која го опслужува нафтоводот „Дружба 1“, преку кој Словачка задоволува 100% од потребите за нафта, а Унгарија 83%.
- Нападот врз станицата Калејкино во регионот Татарстан, повеќе од 1.200 километри од границата со Украина, предизвикал пожар и голема штета, која нема да може да биде санирана долго време.
- По украинскиот напад, словачкиот премиер Роберт Фицо порача дека неговата земја повеќе нема да ѝ испорачува струја на Украина.
- Унгарија, пак, синоќа во ЕУ ги блокираше иницијативата за нов пакет санкции за Русија и одлуката за заем за Киев од 90 милијарди евра. Премиерот Виктор Орбан го предупредил претседателот на Европскиот совет, Антонио Кошта, дека Унгарија ќе го блокира заемот се додека Украина не го реши прекинот на испораката на нафта, кој го опиша како „неиспровоциран чин на непријателство што ја поткопува енергетската безбедност на Унгарија“.
- Унгарија и Словачка и пред овој напад ги обвинија украинските власти дека намерно не ја поправаат штетата на нафтоводот Дружба на своја територија, предизвикана од наводен руски напад на 27 јануари. Двете земји тогаш објавија дека ја прекинуваат испораката на нафта во Украина, затоа што првенствено мора да се грижат за сопствените залихи.
- Иран формира нова дигитална платформа за осигурување „Ормуз сејф“, како ново владино тело за управување со бродскиот сообраќај низ Ормускиот проток. Платформата ќе се потпира на плаќања со криптовалути.
- Според планот на Министерството за економија, управувањето со теснецот преку рамка за осигурување би овозможило издавање на разни полиси за поморско осигурување, како и сертификати за финансиска одговорност, наместо да се наплаќа „патарина“. При идеални околности, ова би можело да генерира до 10 милијарди долари приходи за Техеран.
- Планот ќе почне со осигурување кое покрива инспекција, задржување и конфискација на бродови. Штетата од воени напади нема да биде покриена.
- „Овој модел би бил прифатлив за другите земји во мирно време, а сепак би му дозволил на Иран да врши контрола врз теснецот“, објави државната новинска агенција Фарс.
- Молдавските лидери ја осудија како „закана“ одлуката на Владимир Путин да го поедностави процесот на давање руско државјанство на жителите на регионот Придњестровие, кој се отцепи од Молдавија пред 36 години.
- Една половина од жителите на Придњестровие веќе имаат руско државјанство. Декретот на Путин објавен во петокот им овозможува на уште 350.000 луѓе да добијат руски пасоши без да го исполнат условот за постојан престој во Русија.
- „Ова е начин повторно да ни се закануваат, бидејќи на Русија не ѝ се допаѓаат нашите акции за реинтеграција. Веројатно им требаат повеќе луѓе за да испратат во војната во Украина“, изјави молдавската претседателка Маја Санду.
- Рускиот амбасадор во Кишињев, Олег Озеров, изјави дека потегот е од хуманитарни причини, во согласност со меѓународното право, поради „зголемениот притисок“ од Молдавија врз Русите. Тој ги оцени реакциите како „лицемерие“, бидејќи Молдавија им дозволува на нејзини граѓани да добиваат романски пасоши.
- Придњестровие се отцепи во 1990 година, кога Молдавија сè уште беше советска република. По двегодишен судир со повеќе од 1.000 жртви, двете страни се во мир, заштитуван од контингент од 1.500 руски војници. Регионот има свои политички институции - парламент, војска, полиција и поштенски систем.
