- Украина го ограничи на два месеци времето што војниците може да го поминат на првата линија на фронтот. Потоа ќе следи задолжителна ротација во рок од еден месец. Уредбата вклучува и задолжителни медицински проценки и навремено обезбедување храна и муниција за персоналот на фронтот.
- „Целта на директивата е да се зачува здравјето и животот на војниците и стабилноста на одбраната, особено откако доминацијата на беспилотните летала ја прошири зоната на убивање“, објасни командантот на оружените сили, генералот Олександр Сирски.
- Директивата доаѓа само неколку дена откако на социјални мрежи беа објавени фотографии од исцрпени и ослабени војници од 14-та посебна механизирана бригада. Анастасија Силчук, сопруга на еден од војниците, објави дека седум месеци испораката на храна, вода, медицински материјали и гориво до нивната позиција доцнела по 7 до 14 дена.
- Максималните „смени“ на фронтот за украинските војници досега беа пропишани на 15 дена. Тоа речиси никаде не се почитувало. Според непотврдени извештаи, имало екстремни случаи на војници што биле цела година на позиција.
- Во студија на Канцеларијата на воениот правобранител се заклучува дека по 40 дена поминати во континуитет на фронтот, војниците честопати станувале рамнодушни кон преживувањето.
- Европската Унија може да замрзне руски сметки поради војната во Украина, дури и ако не постои директна правна врска на сопствениците со лицата и фирмите против кои се воведени санкции, пресуди Судот на правдата на ЕУ.
- „Концептите на сопственост и контрола треба да ги опфатат сите форми на моќ или влијание што се вршат врз средствата, дури и ако не постои правна врска меѓу нив и засегнатото лице“, пишува во одлуката на судот.
- Одлуката на судот на ЕУ се однесува на три случаи во Италија, во врска со заплена на компании и јахта за кои има сомневања дека биле во сопственост на Руси на списокот на санкции на ЕУ. Судот го одобри запленувањето, иако биле утврдени само индиректни врски со санкционирани лица.
- „Целта на замрзнувањето на средствата е да се ограничат колку што е можно повеќе сите трансакции што можат да се извршат со нив. Секое заобиколување на санкциите треба да се спречи“, стои во пресудата.
- Германскиот канцелар Фридрих Мерц предложи Украина да стане „придружна членка“ на Европската Унија - да им се дозволи на украински претставници да учествуваат на самитите и министерските состаноци на ЕУ, но без право на глас.
- Украина би била опфатена со клаузулата за заемна помош на блокот и би имала право на финансирање од делови од буџетот на ЕУ.
- Привременото членство би било поништено ако Киев отстапи од стандардите за владеење на правото неопходни за целосно пристапување.
- „Очигледно е дека нема да можеме наскоро да го завршиме процесот на пристапување (на Украина), со оглед на безбројните пречки и политичката сложеност на процесите на ратификација. Предвидувам политичко решение што значително ќе ја доближи Украина до Европската Унија и нејзините основни институции веднаш... Тоа ќе помогне во олеснувањето на тековните мировни преговори“, забележал Мерц во писмо до шефовите на ЕУ - Урсула фон дер Лајен и Антонио Кошта.
