- Киев попушта за една од клучните точки од мировните преговори со САД и Русија - воспоставување демилитаризирана зона во Донбас, слична на онаа помеѓу Северна и Јужна Кореја, само подлабока и поширока. Украинските сили целосно би се повлекле од териториите на Луханск и Доњецк, но Киев бара гаранции дека руските сили нема да навлезат.
- „Демилитизирана зона мора да постои од двете страни на линијата“, изјави украинскиот преговарач Михајло Подољак за Ле Монд. „Ќе биде потребно да се дефинира дали треба да се повлечат сите видови оружја, или само тешкото. За да се спречат прекршувања, мора да има странски мисии на теренот. Ова е природен формат за крај на конфликтот, со оглед на тоа што дел од територијата за жал ќе остане под де факто руска окупација и дека во секој случај ќе се воспостави линија на раздвојување“.
- Подољак додаде дека за Киев би било идеално САД да учествуваат во силите за надзор и контрола на примената на договорите во зоната.
- Претседателот Володимир Зеленски потврди дека САД предложиле демилитаризирана зона, но истакна дека какви било територијални отстапки мора да бидат потврдени на избори или на референдум, кои тешко може да се одржат додека се војува.
- За ова прашање утре во Париз би можел да се одржи состанок на претставници од САД, Германија, Британија, Франција и Украина, а два дена подоцна лидерите на овие земји би требало да се сретнат со американскиот претседател Трамп.
- Париски суд им изрече затворски и други казни на осум мажи и две жени поради тврдењата дека Брижит Макрон, првата дама на Франција, всушност била родена како маж.
- На еден од обвинетите му е изречен шестмесечен затвор, а осуммина добија условни казни од 4 до 8 месеци затвор. Дополнителните казни вклучуваат парична отштета и посетување предавања за подигање на свеста за сајбер вознемирување. На петмина им е суспендиран профилот на социјалните медиуми на кој ги објавиле критиките.
- Десеттемина, чии имиња не се објавени, се прогласени виновни за ширење лажни вести и за вознемирување преку интернет преку „злонамерни коментари“ за полот и сексуалноста на Брижит Макрон, или затоа што како „педофилија“ го оцениле тоа што е 24 години постара од нејзиниот сопруг, претседателот Емануел Макрон.
- Во јавноста одамна се проширија гласини дека Брижит Макрон е родена како машко и дека вистинското име ѝ е Жан-Мишел Троње. Претседателот Емануел Макрон и првата дама долго време ги игнорираа овие написи, но лани се решија да тужат поради нарушување на угледот.
- Судот ја отфрли одбраната на обвинетите дека нивните објави биле сатира. „Ова е ужасно. Одвратно е. Слободата на говорот во Франција повеќе не постои“, изјави писателот Бертран Шолер, кому му е изречена шестмесечната условна затворска казна.
- Делси Родригез, која ја извршува претседателската функција во Венецуела, во помирувачки тон понуди да соработува со Вашингтон.
- Откако американските сили ги грабнаа претседателот Николас Мадуро и неговата сопруга Силија Флорес од Каракас за да се соочат со обвиненија поврзани со дрога во Њујорк, Родригез во саботата ги повика САД да го ослободат Мадуро и да го вратат во Венецуела. Во објава на Инстаграм во неделата таа зазеде поинаков пристап.
- „Венецуела ја потврдува својата посветеност на мирот и мирниот соживот... Ја покануваме американската влада да соработува со нас на агенда за соработка... Претседателот Доналд Трамп, нашите народи и нашиот регион заслужуваат мир и дијалог, а не војна. Нашата земја има право на мир, развој, суверенитет и иднина“, порача Родригез.
- Трамп им се закани на функционерите лојални на Мадуро дека „ризикуваат да платат многу голема цена, веројатно поголема од Мадуро, ако не го направат она што е исправно“. Тој додаде дека неговата администрација стапила во контакт со канцеларијата на Родригез и дека во вистинско време директно би разговарал со неа.
- „Не ме прашувајте кој е надлежен (во Каракас), бидејќи одговорот би бил многу контроверзен... Ние сме надлежни“, рече Трамп.
