- Володимир З., украински нуркач осомничен дека во 2022 година го поставил експлозивот што го разнесе гасоводот Северен тек, е уапсен во полскиот град Прушков близу Варшава.
- Саботажата на гасоводот на дното на Балтичко Море ја прекина испораката на руски гас до Германија. Никој не ја презеде одговорноста за експлозијата. Берлин распиша меѓународна потерница по Володимир З. осомничен дека го поставил експлозивот, и по Серхиј К. кој ја координирал акцијата.
- Серхиј неодамна беше приведен во Италија. И двајцата ќе се борат против екстрадиција во Германија, врз основа на тврдењето дека потерниците не важат поради руската воена интервенција во Украина.
- Нападот врз инфраструктурата се однесува кон „Газпром“, кој е еден од сопствениците и директно ги финансира воените операции во Украина, изјави адвокатот на Володимир.
- Павел Дуров, еден од основачите на популарната апликација Телеграм, понуди откуп за францускиот кралски накит што пред некој ден беше украден од парискиот Лувр. Артефактите ќе ги подари на музејот што Лувр го отвори во Абу Даби.
- Четворица крадци во неделата провалија во најпознатиот музеј во Париз и избегаа со осум артефакти со непроценлива вредност - ѓердани, обетки и тијара на кралското семејство од 19-ти век.
- „Со задоволство би го откупил ограбениот накит и би му го вратил на Лувр. Мислам на Абу Даби, се разбира, никој не краде од Лувр во Абу Даби“, порача рускиот милијардер, кој сега живее во Дубаи.
- „Грабежот воопшто не ме изненадува. Тој е уште еден тажен знак за пропаѓањето на некогаш великата земја, во која владата ги усоврши фантомските закани за луѓето, наместо да се соочи со вистинските закани“, додаде Дуров.
- Тој неодамна го обвини Париз дека настојува да наметне политичка цензура на Телеграм. Лани беше приведен на аеродром во Париз под обвинение дека од платформата не отстранил „нелегална содржина“.
- Европскиот парламент поддржа построги правила за возачки дозволи, со цел да ја зголеми безбедноста на патиштата на кои во сообраќајни несреќи секоја година гинат по речиси 20.000 луѓе. Новите правила ќе стапат на сила 20 дена по објавувањето во Службениот весник на ЕУ, а членките ќе мора да ги вградат во националните закони во рок од три години.
- Дозволите ќе се издаваат на 15 години, односно на 10 години во членките во кои возачката дозвола е официјален документ за идентификација. Дозволите за управување камиони ќе се обновуваат на пет години.
- Првпат на ниво на ЕУ се утврдува пробен период од две години за неискусни возачи. За нив ќе има построги ограничувања и казни за возење под дејство на алкохол или ако не врзуваат појаси.
- Членките ќе бидат обврзани на размена на информации за одземање на возачките дозволи во случај на возење под дејство на алкохол и дрога, за учество во сообраќајна несреќа со смртни последици и за претерано надминување на брзината за повеќе од 50 километри на час.
- Со новите правила се предвидува главен формат на возачка дозвола постепено да стане дигиталната, како апликација на мобилен телефон. Секој што ќе побара ќе ја добие и како картичка, најдоцна три недели по барањето.
