- Началникот на полициската управа на Белград и поранешен советник на претседателот Александар Вучиќ, е уапсен и му е одреден притвор поради сомневање дека учествувал во прикривање на трагите на пукањето по кое е исчезнат Александар Нешовиќ, познат како Баја, човек кого српските медиуми го поврзуваат со криминалното подземје.
- Полицискиот полковник Веселин Милиќ бил присутен во ресторанот „27“ во престижната населба Сењак, наводно за да смири двајца скарани ликови од подземјето, при што средбата тргнала на лошо (Саша Вуковиќ Боске го убива Баја), по што Милиќ со телохранителите трапаво пробале да ги скријат трагите.
- Баја или неговото тело уште не се пронајдени.
- Освен Милиќ, уапсени се уште 10 лица меѓу кои и полицајци и сопственикот на ресторанот. Директорот на полицијата соопшти дека во расчистување на случајот работат 200 полицајци.
- Државата и општините со години ги убедуваа граѓаните да ги заменат старите печки со печки на пелети за да го намалиме загадувањето. За тоа се трошеа јавни пари.
- Денес, пред почетокот на грејната сезона, вреќа од 15 килограми стигнува до 399 денари, цените често не се ни јавно објавени, а граѓаните масовно ги продаваат печките во кои некогаш беа поттикнати да инвестираат.
- Каде пропадна добрата идеја? Државата ја субвенционираше печката. Горивото го заборави. Не е доволно да му помогнеш на граѓанинот да ја купи печката, а потоа да му кажеш дека горивото е работа на пазарот.
- Предлогот на американскиот претседател Доналд Трамп за преименување на вештачката интелигенција (AI) во супер интелигенција (SI) повлече рекордно зголемување на регистрациите на словенечки интернет домени (.si).
- Националниот регистар на Словенија објави дека во септември имало огромна побарувачка за .si домени: биле регистрирани 44.000 .si адреси, а само месец претходно имало помалку од 2.000.
- Тоа е зголемување од речиси 2.200 проценти.
- Праксата за шпекулативно купување домени се вика "cyber-squatting" и целта е тој подоцна да се продаде по висока цена. Рик Шворц во 1997 го купи men.com за 15.000 долари. Седум години подоцна го продаде за 1,32 милиони долари.
- Толку е веста. Легни.си.
