Вести › Набрзинка

Три години и еден месец затвор за Марјан Стаменковски од „Доказ“

4 април 2023

Освен затворската казна и паричната од 5.000 евра, Стаменковски доби и забрана да регистрира домен за портал во земјава во наредните десет години, а со првостепената пресуда престануваат да важат и регистрациите на домените што ги направил досега.
Стаменковски е прогласен виновен за сите пет кривични дела за кои се гонеше. Станува збор за две кривични дела ширење расистички и ксенофобичен материјал, уцена, пиратерија на аудивизуелно дело и злоупотреба на лични податоци.
Од приватната комуникација со истражителката во МВР, сопственикот на Доказ објавувал лични податоци и фотографии за други истражители ангажирани во ОЈО Скопје.
Овој судски процес не ги обелодени нарачателите на текстовите на Стаменковски но за тоа се водело втор предмет.

извор

Чеченците за Кадиров 99,85%

21 септември 2026

Рамзан Кадиров, близок сојузник на рускиот претседател Владимир Путин, е реизбран за петти мандат како лидер на јужниот регион Чеченија, со 99,85% од гласовите, соопшти руската изборна комисија.
Имал двајца противкандидати, кои добиле по 0,05% од гласовите.
Кадиров го подобри резултатот од 2021 година, кога освои 99,73%.
Немаше изненадувања ни на изборите за пратеници за руската Државна Дума, први откако почна војната во Украина. Партијата Обединета Русија на Путин освои рекордни 355 од вкупно 450 мандати, Комунистичката партија освои 40 пратеници, а националистите од ЛДПР 25.
Путин го претстави гласањето како „тест за јавната поддршка за специјалната операција“ во Украина, но повеќето политичари кои отворено се спротивставуваа на војната беа спречени да се кандидираат. На либералната партија „Јаблоко“ не ѝ беше дозволено да истакне листа на национално ниво.
Русија спроведе избори и на Крим, кој го анектираше во 2014 година, како и во окупираните делови на украинските региони Доњецк, Луханск, Запорожје и Херсон. Украина ги прогласи изборите таму за незаконски. Европската Унија исто така објави дека нема да го признае гласањето на окупираните територии ниту резултатите.

извор

Италија сака да забрани бурки и никаб во училиштата

21 септември 2026

Италијанската премиерка Џорџа Мелони најави планови за забрана на облека што го покрива лицето, како што се бурка и никаб, во училиштата, за ограничување на бројот на странски ученици во паралелки и обврска за родители на странски ученици да го научат италијанскиот јазик.
„Италијанските училишта треба да останат места каде што учениците можат да комуницираат, да учествуваат и да се интегрираат во општеството, изјави Мелони пред младинското крило на нејзината партија Браќа на Италија.
Франција, Белгија, Данска и Австрија имаат ограничувања за облека што го покрива лицето, а Швајцарија лани воведе национална забрана.
Мелони ги претстави мерките како прашање на слобода и еднаквост на жените. Истакна дека ниту една традиција не смее да се користи за да се принуди млада жена да го крие своето лице. Предлогот не се однесува на марамите и хиџабот, кои не го покриваат лицето.
Законското ограничување на бројот на странски ученици во иста паралелка е насочено кон интеграцијата. „Ако само мал број ученици имаат тешкотии со зборувањето италијански, наставниците и соучениците можат да им помогнат“, објаснува Мелони. Во училиштата низ Италија денес има 11,6% деца кои не се италијански државјани.

извор