- Доналд Трамп најави дека ќе испрати уште 5.000 американски војници во Полска, неполна недела откако САД ненадејно го откажаа распоредувањето на 4.000 трупи во оваа земја.
- Трамп објасни дека ја донел новата одлука поради добрите односи со новиот полски претседател. „Врз основа на успешниот избор на сегашниот претседател на Полска, Карол Навроцки, кого со гордост го поддржав, и нашиот однос со него, со задоволство објавувам дека САД ќе испратат дополнителни 5.000 војници во Полска“, порача Трамп на Truth Social.
- Европа е во конфузија. Администрацијата на Трамп пред две недели објави дека ќе повлече околу 5.000 војници од контингентите кај партнерите од НАТО во Европа, кои ги обвини дека не го преземаат доволно голем товар за сопствената одбрана и не направиле повеќе за да ја поддржат војната на САД против Иран.
- Пред една недела Пентагон го откажа најавеното испраќање на 4.000 војници од армиската Втора оклопна бригада во Полска. Откажано беше и распоредувањето на персонал обучен за управување ракетни системи со долг дострел во Германија.
- „Ова не се добро осмислени одлуки. Ова се импулсивни одлуки засновани на каприците на Трамп. (Државниот секретар) Рубио ќе има тешкотии да им ги објасни дивите промени на Трамп на Европејците кои бараат конзистентност, дури и ако не се согласуваат, оцени Иан Кели, амбасадор на САД во Грузија во времето на првата администрација на Трамп.
- Од денеска на сила стапува новиот Пакт за миграција и азил на ЕУ – пакет од десет реформи што опфаќаат построги контроли на границите, обработка на барањата за азил и депортациите и порамномерно ја распределива одговорноста за сместување на мигрантите низ земјите-членки.
- Барателите на азил од „безбедни“ земји или оние што претставуваат потенцијална закана за безбедноста се соочуваат со забрзано тримесечно време на обработка и се ограничени на една можност да поднесат жалба за одбиено барање.
- Се дава приоритет на брзо враќање на лицата кои не ги исполнуваат условите за азил, се прошируваат овластувањата за депортации и се овозможува отворање центри за репатриација.
- Новата биометриска база на податоци (Еуродак) собира отпечатоци од прсти и фотографии на лицето од сите мигранти - вклучително и деца на возраст од шест години - за да ги следи нивните движења и да спречи неовластено патување во рамките на блокот.
- Земјите што се најсилно оптоварени со миграција ќе добијат загарантирана помош од другите членки на ЕУ – да примат дел од мигрантите или да обезбедат директна финансиска поддршка.
- Конгресот на САД првпат по 2008 година не ја продолжи алатката што на разузнавачката заедница ѝ овозможуваше да шпионира странци, но и без налог да има надзор врз американски граѓани. Деветнаесет републиканци им се придружија на 199 демократи и гласаа против.
- Важноста на Законот за надворешно разузнавање (FISA) завршува денеска. Спорниот Член 702 им дозволува на разузнавачките агенции без налог да шпионираат странски државјани и во САД и во светот, заради откривање терористички и други закани за националната безбедност.
- Поради правна дупка, тоа овозможува и следење на комуникациите на сите Американци со странци – електронска пошта, пораки и разговори по телефон. Самиот Трамп се жалеше дека бил жртва на ваква злоупотреба.
- Сенаторот Рон Вајден забележа дека повеќето овластувања на FISA ќе останат во сила до март 2027 година, дури и ако програмата престане да важи. Компаниите сè уште ќе бидат законски обврзани да ги почитуваат директивите за предавање на податоци за комуникација на целите.
