„Најдоброто допрва доаѓа!“, напиша Трамп објавувајќи се дека се поставил за претседател на Центарот Кенеди за перформативни уметности.
Со негова одлука биле сменети неколку членови на надзорниот одбор на Центарот, тој ќе биде прв човек а со смените најавува доаѓање на златна ера на американската уметност и култура.
Трамп го фати на заб Центарот уште лани, кога тогашниот менаџмент на институцијата дозволи да биде изведено шоу на дрег бенд од Нешвил кој изведува преработки на Грејтфул Дед. А добри се, шо има везе перики и сукњи шо носат.
Премиерот Кир Стармер најави дека Британија ќе ја признае државата Палестина во септември на Генералното собрание на Обединетите нации, освен ако Израел во меѓувреме не преземе „значителни чекори за да запре ужасната ситуација во Газа“, вклучувајќи прекин на огнот и обврзување на долгорочен мировен процес.
Израел му возврати исто како на најавата на францускиот претседател Макрон: „Одлуката за признавање на Палестина би била награда за Хамас и би ги нарушила напорите за прекин на огнот“.
Опозициските либерали го повикаа Стармер да ја признае Палестина веднаш и да не ја користи како закана за притисок врз Израел.
Американскиот претседател Доналд Трамп, кој само неколку часа претходно се сретна со Стармер, изјави дека не разговарал за признавање на Палестина: „Ќе испратиме многу пари таму и храна“.
Владата на Нов Зеланд воведува закон што ќе ги остави без право на глас многумина избирачи. Ќе им биде одземено правото на глас на лицата што издржуваат затворска казна. Граѓаните повеќе нема да можат да се регистрираат за гласање на денот на изборите. Тоа ќе мора да го сторат најдоцна 13 дена пред отворањето на гласачките кутии.
„Се исфрлаат застарени и неодржливи правила за гласање. Пакетот амандмани ќе го засили системот, ќе помогне навремени резултати, ќе ги намали трошоците и ќе им понуди поефикасни услуги на гласачите“, изјави предлагачот на законот, министерот за правда Пол Голдсмит.
Јавната обвинителка Џудит Колинс оцени дека законот може да падне пред уставен суд поради судир со правото на слобода на изразување и со правото на гласање.
„На изминатите избори 97.000 луѓе првпат се регистрираа на денот на гласањето, а уште 134.000 ги променија изборните единици. Приближно толку луѓе ќе бидат погодени од новите правила“, изјави Колинс.
„Треба да им олесниме на луѓето да гласаат, не да им биде потешко. Така ќе се слушне сечиј глас“, коментира Данкан Веб, пратеник од опозициските лабуристи.
