Вести › Набрзинка

Тотална забрана за летање дронови во Данска

29 септември 2025

Данска ги забрани сите летови на цивилни дронови во текот на оваа недела спроти самитот на Европската Унија во Копенхаген, по серијата инциденти со неидентификувани беспилотни летала околу аеродромите во изминатите две недели. Прекршителите на забраната ќе се соочат со парична казна или до две години затвор.
„Полицијата ја засили готовноста пред самитот. Не треба да се грижат ни Данците ни нашите гости“, објави Министерството за транспорт.
Данските власти се уште не откриле кој бил одговорен за надлетувањата на аеродромите. Министерката за одбрана ги нарече инцидентите „хибриден напад“.
Дронови управувани од непознати оператори во изминатата недела беа забележани и во Норвешка и во Романија. Ниту еден досега не бил соборен.
Министрите за одбрана од десет членки на ЕУ во петокот постигнаа согласност за создавање „европски ѕид против беспилотни летала“, насочен кон исток.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор