Вести › Набрзинка

Со пари од царините Трамп ќе им помага на фармерите

26 септември 2025

Претседателот Доналд Трамп најави дека дел од приходите од царините ќе бидат искористени за финансиска помош за фармерите што се загрозени од трговските ограничувања и од други економски проблеми.
Некои пари од царините ќе им ги дадеме на нашите фармери, кои некое време ќе бидат погодени додека царините не почнат да им носат полза. Ќе се потрудиме да останат во добра форма, бидејќи ќе земаме добри пари, изјави Трамп. За ова ќе биде потребна поддршка од Конгресот. Белата куќа ја очекува до 21 ноември, а исплатите би почнале во 2026 година.
Моќното земјоделско лоби во САД со месеци ги притискаат Белата куќа и Конгресот да најдат начин да им ја надоместат штетата што ја трпат додека чекаат на отворање на новите трговски можности што им ги вети претседателот.
Трамп синоќа го прошири списокот со царини со 100% давачки за увоз на лекови, 30% за мебел (50% за во кујни и бањи) и 25% за тешки камиони. Царините ќе важат од 1 октомври.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор