Вести › Набрзинка

Сијарто: ЕУ применува двојни стандарди за проширувањето

1 октомври 2025

Шефот на унгарската дипломатија Петер Сијарто ја обвини Европската Унија дека очигледно применува двојни стандарди за процесот на проширување. Унгарија ја обвинуваат дека го блокира приемот на Украина, а се премолчува кога други земји го употребуваат правото да блокираат кандидати.
„Грција со години ги блокираше пристапните преговори со Македонија. Дали некој ги обвини Грците? Не. Сега Бугарите имаат предуслови. Дали некој ги критикува? Не, се разбира. Е тоа се двојни стандарди“, изјави Сијарто за РТС.
Тој додаде дека правото на вето го злоупотребиле Австрија, а потоа и Холандија, за да го спречат влегувањето на Романија во Шенгенската зона, иако биле спремни. Со вето било спречено и отворањето нов кластер поглавја за Србија, за да не продолжат преговорите.
Ако некоја држава од централна Европа каже за нешто „не“, тогаш тоа веднаш е неприфатливо, „го урива европското единство“ и „тоа се шпиони на Путин“... Секогаш како виновник е наведена Унгарија, затоа што имаме влада што работи успешно, но не е во склад со политичкиот вкус на Брисел, бидејќи се противиме на војната, на миграциите, на родовата пропаганда... Кога нема да се согласиме со нешто веднаш нè стигматизираат. Имаме право на тоа, така функционира ЕУ, мора да се постигне едногласност и тоа се клучни вредности, изјави Сијарто за РТС.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор