Една недела откако полицијата влезе во Градскиот трговски центар да проверува дали копачи на криптовалути „крадат“ струја, случајот е затворен.
По излегувањето на терен, полицијата не нашла за потребно да се јави до јавното обвинителство и да побара насоки за делување, што обично го прави и за случаи со „украдени кокошки“.
Според мислењата на обвинителите, сега е веќе предоцна да се бара што било во случајот, во услови кога и да се отиде на терен, веќе ништо не е исто.
Поради војната во Иран и глобалната енергетска криза, Европската комисија го повлече предлог-законот за забрана за увоз на руска нафта што требаше да го претстави на 15 април.
Иницијативата не е целосно укината, туку ќе биде одложена за подоцна. „Не можам да ви кажам нов датум, но ве убедувам дека остануваме посветени на овој предлог“, изјави портпаролката Ана-Каиса Итконен.
По руската воена инвазија врз Украина, Европската Унија постепено го намалуваше увозот на руска нафта. Со новиот закон увозот треба да се спушти на нула од есента идната година. Законот се води како енергетска политика, а не како надворешна, поради што може да биде усвоен со квалификувано мнозинство гласови.
Унгарија и Словачка - единствените членки што купуваат руска нафта, најавија дека ќе ја обжалат забраната.
92 антипротони денеска без какви било инциденти биле транспортирани со камион четири часа во кругот на Европската организација за нуклеарни истражувања (ЦЕРН) во Женева. Успехот на ризичниот експеримент отвора можност за транспортирање антиматерија до лаборатории во кои може детално да се проучуваат честичките.
Антипротоните (негативно наелектризирани протони) со вкупна маса нешто поголема од сто атоми на водород, биле поставени во огромен контејнер од 1.000 килограми со супермагнети разладени до минус 269 Целзиусови степени, кои овозможувале товарот да лебди во вакуум. При случаен допир на антиматерија со материја честичките се уништуваат, ослободувајќи огромна енергија. Ризикот од експлозија при транспортот бил низок поради малата маса на антиматеријата.
„Контејнерот ги издржа сите критични моменти – промена на брзината и правецот, тргнување и кочење... Но, работата не е завршена. Контејнерот може да ги задржи антипротоните четири часа, а до Дизелдорф има многу повеќе возење“, изјави претставничката на ЦЕРН, Софи Тесаури.
Планот е првиот транспорт од „фабриката“ за антиматериски честички во Женева да биде до супермодерната лабораторија на Универзитетот „Хајнрих Хајне“ во Дизелдорф, каде што мерењата се сто пати попрецизни од било кое досега на ЦЕРН. Од Женева до Дизелдорф има речиси 800 километри.
Долгорочната цел е да се реши една од најголемите мистерии на физиката: Зошто има огромен вишок на материја во универзумот, а материјата речиси целосно исчезнала? При Големата експлозија, веројатно биле создадени приближно еднакви количини на материја и антиматерија.
