Вести › Набрзинка

Шпанија ќе добие ембарго од Трамп ако не му отстапи воени бази

4 март 2026

Трамп се закани дека целосно ќе ја запре трговијата со Шпанија, која одби да им ги отстапи на Американците своите бази за војната против Иран.
САД мораа да преместат 15 авиони, вклучувајќи воздушни танкери, од базите Рота и Морон во јужна Шпанија, откако социјалистичката влада забрани тие да се користат во операцијата Епски гнев.
Трамп ја критикуваше и одлуката на Шпанија да не го зголеми воениот буџет на 5% од својот БДП, како што прифатија сите други членки на НАТО на самитот лани.
„Ќе ја прекинеме целата трговија со Шпанија. Не сакаме да имаме ништо со Шпанија“, изјави Трамп по состанокот со канцеларот Фридрих Мерц во Белата куќа. „Шпанија нема апсолутно ништо што ни треба. Можам да правам што сакам со ембарга“, додаде Трамп, иако Врховниот суд на САД во февруари ги прогласи за нелегални неговите царини за сите земји во светот.
Мерц ги отфрли заканите од Трамп за Шпанија. „Му кажав многу јасно: Не можете да склучите изолиран договор со Германија или договор со цела Европа, но со исклучок на Шпанија. Сите сме во ист брод тука“, изјави Мерц за АРД.

Трамп јавно го критикуваше Мадрид за време на состанокот, велејќи дека некои европски земји, вклучително и Шпанија, се однесувале лошо поради американските напади врз Иран. Трамп рече дека Шпанија одбила да даде дозвола за користење на своите воени бази и се закани дека САД би можеле да ја прекинат трговијата со земјата како одговор.
Мадрид одговори дека „САД мора да бидат свесни за автономијата на приватните бизниси, меѓународното право и билатералните трговски договори меѓу САД и Европската Унија“. За можното ембарго оцени дека ги има потребните ресурси да ги ограничи последиците.
САД имаат трговски суфицит со Шпанија од 4,8 милијарди долари. Извезуваат нафта и течен природен гас, а увезуваат маслиново масло, автоделови, челик и хемикалии.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор