Вести › Набрзинка

Шпанија им дава државјанство на потомците на „шпанските борци“

4 ноември 2025

Шпанската влада им додели државјанство на 170 потомци на волонтери во Меѓународните бригади како признание за нивната борба против фашизмот за време на диктатурата на Франко.
Се смета дека имало околу 32.000 волонтери од целиот свет кои им се придружија на анти-фашистичките бригади.
Имало и околу 140 Македонци, меѓу кои Алексо Дамниевски-Бауман, Цветко Узуновски, Елисие Поповски, Кирил Ќамилов, Трајко Јордан Мисковиќ, Вера Ханем (единствената жена од Македонија, медицинска сестра во бригадите), Аголи Урфи Аки и други. (повеќе - тука)
65 од нив загинале во борбите против франкистите.
На церемонијата во Мадрид, шпанскиот премиер, Педро Санчез, изјави: „Ќе ни биде чест да ги наречеме сонародници. Повикуваме на одбрана на истата демократија како што тие ја бранеа во време кога таа е под закана низ целиот свет“.
Овој месец е 50-годишнината од смртта на Франциско Франко, чиј државен удар во јули 1936 година го предизвика тригодишниот конфликт во кој загинаа над 500.000 луѓе.

извор

Почина Дик Чејни

4 ноември 2025

Дик Чејни, поранешниот моќен американски потпретседател што инсистираше на инвазијата врз Ирак, почина на возраст од 84 години.
Чејни беше шеф на Пентагон за време на мандатот на Џорџ Буш постариот и потпретседател на Буш помладиот. На втората функција беше одговорен за реакцијата на САД на терористичкиот напад од 11 септември 2001 година - за следењето на граѓаните, притворањето и измачувањето на нелегално грабнатите осомничени терористи.
Поддржуваше мачење со вотербординг „ако тоа спаси нечиј живот“. За инвазијата во Ирак тврдеше дека американските војници ќе бидат пречекани како ослободители. Ги однесе во војна од која повеќе од 4.000 не се вратија.
По напуштањето на функциите водеше кампања против Трамп, за кого изјави „Тој се обиде да ги украде минатите избори, служејќи се со лаги и насилство за да остане на власт откако граѓаните го отфрлија“. Ги разгневи републиканците кога лани објави дека гласал за Камала Харис.
Срцето на Чејни издржа пет удари пред да биде заменето со друго од донатор. „Секое утро се будам со насмевка, благодарен што ќе поживеам уште еден ден“, изјави Чејни во 2013 година.

извор

Хрватска бележи раст на родени бебиња

4 ноември 2025

Во четири месеци оваа година, од почетокот на јуни до крајот на септември, во Хрватска се родени 656 бебиња повеќе отколку во истиот период минатата година.
Тоа се околу 33 одделенија за првачиња повеќе, вели министерот за демографија, Иван Шипиќ.
Подобрувањето на демографската слика е еден од приоритетите на тамошната влада - се подготвува сеопфатен закон за демографска обнова а се работи и на нов Закон за детски додаток што би ги опфатил сите деца.
За депопулираните општини во Хрватска владата има одвоено поддршка од 30 милиони евра.

извор