- Жртвите на озлогласениот Џефри Епстин (се зборува дека се над 1.000 ) се разочарани и гневни од долгоочекуваното обелоденување на документите поврзани со контроверзните активности на овој милијардер со тесни врски со највисоките кругови на западниот политички и шоубизнис естаблишмент.
- Тврдат дека не е објавено сè (една од жртвите не можела да ја најде нејзината изјава за ФБИ), она што е објавено е темелно редактирано и зацрнето а исчезнале и најмалку 16 фајлови кои првично беа објавени.
- Меѓу исчезнатите материјали наводно е и фотографија на Доналд Трамп од архивата на Епстин.
- „Ако вакви работи кријат, замислете што сè друго кријат“, рече високопозиционираниот демократ Чак Шумер, додавајќи дека се работи за „најголемото заташкување во американската историја“.
- Во еден документ од 119 страници, насловен како „Големата порота - Њујорк“, зацрнета е комплетната содржина и оставен е само насловот.
- Белата куќа тврди дека силното редактирање на објавените материјали е за да се заштитат жртвите.
- На претходно невидени фотографии, поранешниот принц Ендру лежи со пет жени. На други, Клинтон е во џакузи со главната соработничка на Епстин, Гислеин Максвел.
- Дел од документите се рачно напишани пораки од типот „Имам женска за него“ „Ќе има женски ама ми бараат 1.000 долари за една“ и слични.
- Иран формира нова дигитална платформа за осигурување „Ормуз сејф“, како ново владино тело за управување со бродскиот сообраќај низ Ормускиот проток. Платформата ќе се потпира на плаќања со криптовалути.
- Според планот на Министерството за економија, управувањето со теснецот преку рамка за осигурување би овозможило издавање на разни полиси за поморско осигурување, како и сертификати за финансиска одговорност, наместо да се наплаќа „патарина“. При идеални околности, ова би можело да генерира до 10 милијарди долари приходи за Техеран.
- Планот ќе почне со осигурување кое покрива инспекција, задржување и конфискација на бродови. Штетата од воени напади нема да биде покриена.
- „Овој модел би бил прифатлив за другите земји во мирно време, а сепак би му дозволил на Иран да врши контрола врз теснецот“, објави државната новинска агенција Фарс.
- Молдавските лидери ја осудија како „закана“ одлуката на Владимир Путин да го поедностави процесот на давање руско државјанство на жителите на регионот Придњестровие, кој се отцепи од Молдавија пред 36 години.
- Една половина од жителите на Придњестровие веќе имаат руско државјанство. Декретот на Путин објавен во петокот им овозможува на уште 350.000 луѓе да добијат руски пасоши без да го исполнат условот за постојан престој во Русија.
- „Ова е начин повторно да ни се закануваат, бидејќи на Русија не ѝ се допаѓаат нашите акции за реинтеграција. Веројатно им требаат повеќе луѓе за да испратат во војната во Украина“, изјави молдавската претседателка Маја Санду.
- Рускиот амбасадор во Кишињев, Олег Озеров, изјави дека потегот е од хуманитарни причини, во согласност со меѓународното право, поради „зголемениот притисок“ од Молдавија врз Русите. Тој ги оцени реакциите како „лицемерие“, бидејќи Молдавија им дозволува на нејзини граѓани да добиваат романски пасоши.
- Придњестровие се отцепи во 1990 година, кога Молдавија сè уште беше советска република. По двегодишен судир со повеќе од 1.000 жртви, двете страни се во мир, заштитуван од контингент од 1.500 руски војници. Регионот има свои политички институции - парламент, војска, полиција и поштенски систем.
