Извештајот на Светска банка покажува дека македонската економија годинава ќе порасне за само 2,1% што е најниско ниво во Европа.
Само Русија, Украина, Белорусија и Молдавија имаат помала стапка на раст на своите економии оваа година.
„Намалената домашна и надворешна побарувачка, високите влезни трошоци и недостигот на ликвидност може да доведе до дополнителни отпуштања и зголемување на сиромаштијата и растегнување на веќе тесните јавни финансии. Заострувањето на финансиските услови може да влијае на опциите за финансирање и трошоците понатаму“, се вели во извештајот на Светска Банка.
Претседателот Трамп ги прекина сите трговски преговори со Канада поради телевизиска реклама во која се цитира изјава на поранешниот претседател Роналд Реган против воведувањето царини. Владата на провинцијата Онтарио платила 75.000 долари за телевизиската реклама наменета за американската јавност.
„Фондацијата Роналд Реган тукушто потврди дека Канада објави измамничка реклама, која е лажна, и во која Реган зборува негативно за царините. Ова го прават за да извршат притисок врз Врховниот суд на САД и другите судови. Царините се многу важни за националната безбедност и економијата на САД. Поради нивното незамисливо однесување, ги прекинуваме сите трговски преговори со Канада“, порача Трамп.
Фондацијата објасни дека во рекламата погрешно било пренесено радио-обраќање на Реган до јавноста на 25 април 1987 година за слободна и фер трговија. Онтарио не добил дозвола да ја користи и монтира изјавата. Ја повика јавноста да го проследи обраќањето во оригинална форма и најави тужба против Онтарио.
Во рекламата се пренесени изјави на Реган дека „царините можеби изгледаат патриотски, но всушност се на штета на секој Американец, работник и потрошувач“ и дека „поттикнуваат трговски војни, пазарите колабираат, се затвораат бизниси и милиони остануваат без работа“.
Три четвртини од извозот на Канада е наменет за САД. Дневната трговија со стоки и услуги изнесува 3,6 милијарди канадски долари. Дури 85% од стоките се опфатени со регионалниот договор КУСМО и за нив нема царини. За другите има царини од 35%, а за челик и алуминиум се 50%.
Околу 2.000 златни и сребрени монети во вредност од околу 90.000 евра биле украдени од француски музеј само неколку часа по дрската кражба на крунски накит од парискиот музеј Лувр во неделата.
Монетите биле украдени од музејот Maison des Lumières, посветен на филозофот Денис Дидро во Ландр, во североисточна Франција. Не се активирал алармот. Дури во вторникот, кога бил отворен музејот, била забележана кражбата. Витрината била скршена, а специјално избраните златници и сребреници ги немало.
Кралскиот накит ограбен во Лувр е проценет на 88 милиони евра. Четворица крадци облечени како работници со градежен кран се кренале до прозорец, го скршиле, им се заканиле на чуварите, го исекле стаклото што го заштитувало накитот, се вратиле по истиот пат и избегале со електрични тротинети. Во Лувр биле 4 минути, а целата операција траела 8 минути. Не се активирал алармот, а во трите простории со накитот немало камери.
Во септември од Музејот за природни науки во Париз биле украдени шест златни грутки во вредност од 1,5 милион евра. Биле пронајдени во Барселона, кај Кинескиња што сакала да го стопи златото.
Во септември од музеј за порцелан во Лимож биле украдени две чинии и вазна во вредност од 6,55 милиони евра.
