Вести › Набрзинка

САД засилено ќе проверуваат ставови на имигранти за Израел

29 април 2026

Американската служба за државјанство и имиграција од понеделникот ги засили безбедносните проверки на биографиите, досиејата и објавите на интернет на лицата што аплицирале за престој или имиграција во САД, согласно извршната наредба на претседателот Доналд Трамп од февруари.
Њујорк тајмс тврди дека потенцијално дисквалификувачки фактор при аплицирање за зелена карта или натурализација се и критикување на државата Израел. Изразување антисемитски чувства - особено оние што поддржуваат насилство или терористички групи како што се Хамас, Хезболах и Хутите, ќе бидат основа за одбивање на барањата за имиграциски бенефиции.
Мерките ќе влијаат на тековните апликации за зелени карти и натурализација. Службениците добија инструкции повторно и подетално да ги проверат информациите за лицата преку обновениот систем за идентификација на ФБИ.
„Одредени однесувања и изјави може да предизвикаат сериозна загриженост кај персоналот што го разгледува досието на апликантот, вклучително и застапување на терористички идеологии, изразување омраза кон американските вредности, застапување за насилно соборување на владата на САД или обезбедување материјална поддршка на терористички организации. Ваквите дејствија бараат подетално испитување“, соопшти Службата за државјанство и имиграција.
Активисти за граѓански права и религиозни лидери ја осудија мерката, тврдејќи дека ги прекршува правата на правична постапка и слобода на говор и создава небезбедна средина, особено за етничките малцинства.
„Трамп планира да ви го одземе легалниот престој во САД врз основа на тоа дали се согласува со вашиот говор. Од кога станаа антиамерикански критиките на постапки на странска влада? За кого се бори тој?“, реагираше сенаторот Крис Ван Холен.

извор

Поранешен шеф на ФБИ обвинет дека му се заканувал на Трамп

29 април 2026

Џејмс Коми, поранешниот директор на ФБИ кој ја водеше истрагата за „руските врски“ во кампањата на Доналд Трамп, е обвинет за „закана за претседателот на САД“ – дело за кое е предвидена казна до пет години затвор.
Обвинението е поднесено пред федерален суд во Северна Каролина во врска со фотографијата што Коми лани во мај ја објави на својот профил на Инстаграм – бројките „86 47“ исцртани на песочна плажа и објаснување „Кул формација на школки“.
Бројот 86 во сленг се користи како порака за „отфрлање“ или „ослободување од нешто“, а Трамп е 47-от претседател на САД.
Коми подоцна ја избриша објавата и рече дека „не бил свесен дека бројот 86 може да биде поврзан со насилство“.
Министерството за правда лани се обиде да покрене обвинение против Џејмс Коми поради лажно сведочење пред Конгресот, но судија го отфрли случајот.

извор

Емиратите го напуштија ОПЕК

28 април 2026

Обединетите Арапски Емирати, еден од најголемите извозници на нафта во светот, објавија дека од 1 мај повеќе нема да бидат членки на картелите ОПЕК и ОПЕК+.
„Нешто големо се готви на Блискиот Исток. Освен од Иран, ОАЕ се незадоволни од неколку соседи и нивното членство во неколку организации“, забележува Хавиер Блас од Блумберг.
„Оваа одлука е во согласност со долгорочната стратешка и економска визија на ОАЕ и развојот на енергетскиот сектор... По напуштањето на ОПЕК, ОАЕ ќе продолжи со својата одговорна улога со постепено и внимателно зголемување на производството, во согласност со побарувачката и пазарните услови“, објави државната новинска агенција ВАМ.
Емиратите беа меѓу најголемите производители на нафта во ОПЕК. Произведува по 4 милиони барели на ден, со план да ги зголемат капацитетите на 5 милиони дневно од 2027 година.
„Заминувањето на ОАЕ ќе ја ослаби способноста на ОПЕК да ги брани ценовните минимуми, особено за време на економски кризи“, оцени Метју Коули, енергетски аналитичар во УБС.

извор