Вести › Набрзинка

САД запленија танкер крај брегот на Венецуела

11 декември 2025

Во воена операција близу брегот на Венецуела, американските сили презедоа контрола врз голем танкер за нафта. Вооружени припадници на крајбрежната стража се спуштиле на танкерот со хеликоптер од носачот „Џералд Форд“, стациониран во Карипско Море.
Танкерот „Скипер“ испловил од Венецуела на 5 декември со 2 милиони барели сурова нафта. Една половина од товарот бил на државен увозник од Куба. САД во 2022 година го обележале бродот како дел од мрежата за шверц на нафта за Револуционерната гарда на Иран и групата Хезболах.
„Со години танкерот беше под санкции од САД поради нелегална испорака на нафта заради поддршка на терористички организации“, изјави јавната обвинителка Пем Бонди.

„Запленивме голем танкер, најголемиот што бил запленет, и тоа со добра причина“, изјави претседателот Трамп. На прашањето што ќе прават САД со нафтата, тој додал: „Па веројатно ќе ја задржиме“.
Венецуелската влада ги обвини САД за грабеж и пиратерија. „Оваа акција ги покажува вистинските причини за агресијата врз Венецуела. Таа е за нашата нафта, нашата енергија, за ресурсите што им припаѓаат на граѓаните на Венецуела“, соопшти владата.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор