- Стејт департментот им забрани влез во САД на поранешен еврокомесар и лидери на невладини организации за кои тврди дека ги цензурираат американските ставови. Тиери Бретон, кој до лани беше еврокомесар за внатрешен пазар, се смета за главен автор на Законот за дигитални услуги (ДСА), кој содржи мерки против говор на омраза и дезинформации на онлајн платформите.
- Санкции се воведени и за Имран Ахмед, директор на Центарот за борба против дигиталната омраза, Жозефин Балон и Ана-Лена фон Ходенберг од германската организација ХејтЕид, и Клер Мелфорд, која го води Глобалниот индекс на дезинформации (ГДИ).
- Државниот секретар Марко Рубио ги опиша петтемина како „радикални активисти“, кои настојувале да ги замолкнат американските коментатори и компании. „Премногу долго, идеолозите во Европа водеа организирани напори да ги принудат американските платформи да ги казнуваат американските ставови на кои се спротивставуваат. Администрацијата на Трамп повеќе нема да ги толерира овие скандалозни акти на цензура“, порача Рубио.
- Бретон ги отфрли обвинувањата, опишувајќи ги како „лов на вештерки“: „До нашите американски пријатели: Цензурата не е таму каде што мислите дека е“.
- Санкциите се првата официјална мерка од САД по објавувањето на новата Стратегија за национална безбедност, во која европските лидери се обвинети за цензура на слободата на говорот. Тензиите ескалираа откако ЕУ го казни Икс на Илон Маск со 120 милиони евра поради кршење на правилата од ДСА за транспарентност во рекламирањето.
- Украински воени дронови погодиле ирански трговски брод во Касписко Море. При експлозијата загинал еден морнар.
- Техеран го опиша нападот како чин на агресија и објави дека ќе ги брани своите национални интереси и безбедност. Го обвини Киев дека се обидува да ја прошири својата војна со Русија.
- Шефот на дипломатијата Абас Арагчи протестирал до Обединетите нации и ЕУ и ја повика меѓународната заедница да го осуди украинскиот напад. Тој истакна дека Иран никогаш досега не интервенирал во војната помеѓу Русија и Украина.
- Украинскиот претседател Володимир Зеленски претходно соопшти дека Киев постигнал „многу добри резултати“ со напади со голем дострел во Касписко Море, при што биле погодени бродови за транспорт на воен товар во кој е вклучен Иран, како и еден воен брод. Меѓу целите не го спомна иранскиот трговски брод.
- Зеленски додаде дека Русија му пренесува на Иран извидувачки сателитски снимки од Блискиот Исток за да му помогне во војната против САД.
- Претседателот Трамп нареди пред Националниот музеј на американската историја на Смитсонијан во Вашингтон да се постават табли со предупредувања дека дел од музејските изложби „не се точни“. Таблите ќе ги упатуваат посетителите кон алтернативни извори за историјата на САД. Трамп повика на создавање алтернативна „независна“ привремена изложба, во која би биле поправени историските податоци кои администрацијата ги смета за неточни.
- Смитсонијан 180 години функционира како независно тело и не е под директна власт на федералната администрација. Затоа, Службата за национални паркови ќе постави предупредувачки знаци на пешачките патеки околу музејот.
- На 250-годишнината од формирањето на САД, Белата куќа објави извештај во кој го обвини историскиот музеј на Смитсонијан за „идеолошко заробување“ и за „промовирање социјален активизам наместо патриотизам“. Наведува дека музејот не им оддава соодветна чест на 56-те потписници на Декларацијата за независност, туку се фокусира на ропството, угнетувањето и нееднаквоста.
- Директорката Антеа Хартиг, на сослушување пред Конгресот ја бранеше автономноста на музејот и истакна дека „прикажувањето на историјата во целата нејзина комплексност е чин на длабока почит кон националната приказна“.
- Хартиг беше особено критикувана за две неодамнешни изложби: за „Entertainment Nation“, која содржеше експлицитни сексуални прикази, и за „Girlhood (It’s complicated)“ за предизвиците поврзани со родовиот идентитет кај младите жени.
