Вести › Набрзинка

САД и Иран повторно се запукаа, овојпат сериозно

8 јули 2026

По неколкунеделно затишје, американските сили ракетираа повеќе од 80 цели во Иран, на што Иранците одговорија со напади врз американски бази во Кувајт и во Бахреин.

Централната команда на САД објави дека ракетите биле одговор на иранските напади врз три комерцијални бродови во Ормускиот проток. Биле погодени ирански противвоздушни центри, крајбрежни радари, антибродски системи и над 60 брзи чамци на Револуционерната гарда.

САД претходно објавија дека повторно воведуваат блокада за ирански бродови и дека ја укинуваат привремената лиценца за извоз на иранска нафта.
Иран ги обвини САД за прекршување на примирјето и возврати со ракетни напади врз Кувајт, каде што има бази со американски трупи, и Бахреин, каде што е Командата на Петтата флота на САД. „Ерата на провокации и уцени заврши. Нема да потклекнеме“, изјави спикерот на парламентот, Мохамед Багер Галибаф.

Престрелката потврдува дека САД и Иран се поблизу до војна отколку до преговори за конечен мировен договор. Иран инсистира на правото на целосна контрола на сообраќајот низ Ормускиот проток, а Америка настојува да обезбеди слободен премин на бродови. Временската рамка од 60 дена за преговори за конечен договор завршува во август, а двете страни практично не ги ни почнале преговорите.

1 октомври 2026

Германскиот министер за надворешни работи Јохан Вадефул ги повика членките на ЕУ да ги исполнат своите ветувања за проширување кон Западен Балкан. Предупреди дека со тоа, Унијата го ризикува сопствениот кредибилитет и влијание во регионот.
Вадефул потсети дека ЕУ им вети членство на земјите од Западен Балкан на самитот во Солун во 2003 година. Тој го критикуваше и германскиот учинок, потсетувајќи дека поранешната канцеларка Ангела Меркел го започна Берлинскиот процес 11 години подоцна, во 2014 година.
И покрај ова, нема конкретен напредок дури и по уште 12 години.
„Не ги исполнивме нашите ветувања“, рекол министерот. „Навистина би ги повикал сите да им покажат дека ветувањето од Солун е реално, дека сме веродостојни и дека на Европа може да се потпреме“.