- Стејт департментот соопшти дека ја суспендира обработката на имиграциски визи за граѓани од 75 земји, вклучувајќи ја и Македонија, за кои има сомневања дека веројатно ќе имаат потреба од социјална помош додека живеат во САД. Суспензијата, која ќе се применува од 21 јануари, нема да се однесува на оние што бараат привремени туристички или деловни визи, кои се огромно мнозинство.
- „Администрацијата на Трамп става крај на злоупотребата на американскиот имиграциски систем од оние кои би извлекле богатство од американскиот народ. Обработката на имиграциски визи од овие 75 земји ќе биде паузирана додека Стејт департментот ги преиспита процедурите за обработка на имиграцијата за да спречи влез на странски државјани кои би користеле социјална помош и јавни бенефиции“, соопшти Министерството за надворешни на САД.
- Во посебно известување испратено до сите амбасади и конзулати на САД се вели дека и апликантите за неимигрантски визи треба да бидат целосно проверени и тестирани за да се процени дали би можеле да бараат социјална помош. Конзуларните службеници може да побараат од апликантите да пополнат посебен формулар во кој се откажуваат од барање јавни бенефиции додека се во САД.
- Имигрантите што бараат влез во САД веќе се подложуваат на медицински преглед од лекар кој е одобрен од амбасадите. Тие се проверуваат за заразни болести, историја на употреба на дрога или алкохол, ментални здравствени состојби или насилство. Од нив се бара и да имаат голем број вакцини. Новата директива ги прошири проверките на семејниот статус, финансиите, образованието, вештините, познавањето на англискиот јазик и какво било минато користење на јавна помош, без оглед на земјата.
- Покрај Македонија, земји погодени од суспензијата се и Албанија, Босна и Херцеговина, Црна Гора и Косово. Целиот список тука.
- Владата на Аргентина побара да бидат обновени преговорите со Обединетото Кралство во врска со суверенитетот над Малвините (Фолкландските Острови), откако администрацијата на Доналд Трамп најави дека САД може да ја откажат политичката поддршка за Британија во територијалниот спор.
- Во внатрешен меморандум во Пентагон е наведено „преиспитување на дипломатската поддршка за британските империјални поседи“ како можна казна за „непослушните“ сојузници на САД од НАТО, кои ги одбиле повиците да се приклучат во војната против Иран.
- „Аргентина е подготвена да ги продолжи билатералните преговори со Британија за изнаоѓање мирно и конечно решение за спорот за суверенитетот (на островите) кое ќе стави крај на посебната колонијална ситуација во која се наоѓаат“, порача министерот за надворешни работи Пабло Кирно.
- Даунинг стрит објави дека извештајот за меморандумот на Пентагон не го променил ставот на Британија. „Жителите на Фолкландските Острови на референдум гласаа со огромно мнозинство за да останат прекуокеанска територија на Обединетото Кралство“, изјави портпарол на кабинетот на премиерот Кир Стармер.
- Аргентина долго време претендира на суверенитет над Малвините и изврши инвазија врз архипелагот во 1982 година пред да биде поразена од Британија во кратка, но крвава војна.
- Претседателот Хавиер Милеи пред две години изјави дека Аргентина не се откажува од суверенитетот врз островите, но не сакаа конфликт со Обединетото Кралство: „Тие можеби не сакаат да преговараат денес, но во иднина можеби ќе сакаат. Многу позиции се променија со текот на времето“.
- Доналд Трамп го продолжи прекинот на огнот со Иран на „неодредено време“, но на 1 мај завршува законскиот рок од 60 дена за воени операции без експлицитно овластување од Конгресот. Претседателот ќе мора до тогаш да ги повлече воените сили, освен ако не добие специјално одобрување од Претставничкиот дом и Сенатот.
- Постои опција да добие дополнителни 30 дена, само ако писмено потврди дека е потребно време за безбедно повлекување на трупите, а не за продолжување на офанзивата.
- Поранешните претседатели ја заобиколуваа законската одредба со други извори на овластувања. Трамп може да се повика на Овластувањата за употреба на воена сила (AUMF) за специфични цели, применети по нападите од 11 септември 2001 година за „војната против теророт“, во 2002 година за да се отстрани Садам Хусеин и во 2003 година да се одобри инвазијата на Ирак.
- Трамп во првиот мандат во 2020 година го искористи AUMF за да го нареди атентатот врз иранскиот генерал Касем Сулејмани.
- За време на воената кампања на во Либија во 2011 година, администрацијата на Барак Обама тврдеше дека не е потребно експлицитно овластување од Конгресот, бидејќи нема „активна размена на оган со непријателски сили“.
- Бил Клинтон одобри неколку воени операции во Ирак и во Сомалија, а во март 1999 година без одобрение од Конгресот одобри воени дејства против тогашната Сојузна Република Југославија.
