Вести › Набрзинка

Пред 135 години: Првата докторска дисертација за македонскиот јазик

27 ноември 2025

На 27 ноември 1890 (кога Тито не бил ни роден) балто-германскиот лингвист Леонард Готхилф Мазинг ја одбранил првата докторска дисертација за македонскиот јазик на тогашниот Дерптски универзитет (денес Тарту) во Естонија.
Младиот студент дошол во Тарту да студира теологија, но не тргнал по стапките на татко си и не станал свештеник, туку филолог.
Клучна улога во запознавањето со Македонија, како што Леонард Мазинг објаснува во својата докторска дисертација, имале двајца Македонци кои ги запознал во текот на неговите студии во Лајпциг и во Петроград: велешанецот Иван Ѓоргов и Димитар Топеничаров, по потекло од Охрид.
Мазинг оставил и лична кореспонденција со големиот поддржувач на македонскиот јазик - професорот Иван Александрович Бодуен де Куртене, кој бил негов ментор а му бил професор и на Крсте Петков Мисирков.

извор

Сокол на двете страни на Шутка

31 декември 2025

Поранешниот директор на затворот „Скопје“ во Шуто Оризари, Филип Андов – Сокол, е осуден на казна затвор во траење од осум месеци за злоупотреба на службената положба и овластување.
На останатите обвинети, шест затворски полицајци, им се изречени условни казни затвор кои нема да се реализираат доколку во наредните една, односно три години, не сторат ново кривично дело.
Обвинетите на петмина осуденици им овозможиле незаконски погодности. Осудените биле спроведувани до своите домови и до други локации за приватни потреби, спротивно на пропишаната постапка.
Од СДСМ ја обвинија актеулната власта дека преку „нарачани судски пресуди“ врши директна репресија врз партиски функционери од опозицијата.
ВМРО-ДПМНЕ велат дека Андонов неодамна беше назначен за член на Извршниот одбор на опозициската партија за да може пресудата за него подоцна да се претстави како политички прогон.

извор

Путин наредил проширување на тампон-зоната околу Харков и Суми

31 декември 2025

Како одговор на украинскиот напад со дронови врз резиденцијата на рускиот претседател во Новгородската област, Владимир Путин наредил во 2026 година да биде проширена тампон-зоната околу украинските погранични градови Харков и Суми, изјави генералот Валериј Герасимов, началник на Генералштабот на руските сили.
Руската група „Север“ во 2024 година настојуваше да воспостави зона на безбедност во североисточна Украина, за да ја оддалечи украинската артилерија од руска територија и да спречи напади со дронови врз Белгород и Курск.
Украинските власти тврдат дека оваа зона воопшто не е превентивна, туку се користи за да се овозможат подлабоки упади на руските сили на украинска територија.
Киев упорно негира дека испратил дронови кон резиденцијата на Путин и тврди дека тоа се лажни вести што ги шири Кремљ за да ги блокира мировните преговори.

извор