- По кусо боледување почина Виктор Самуел Мизрахи, долгогодишен претседател на Еврејската заедница во Република Македонија.
- Роден во Скопје во 1950 година во еврејско семејство кое загубило стотина членови по бугарската фашистичка депортација на македонските Евреи во Втората светска војна, Виктор Мизрахи активно учествуваше во реализацијата и изградбата на единствениот сефардски Меморијален центар на холокаустот на евреите од Македонија и во поставувањето на спомен обележје на депортираните македонски Евреи во меморијалната поставка во Треблинка, потсетува Еврејската заедница во Македонија.
- Пред неполн месец, Мизрахи напиша отворено писмо против обидите за менување на историјата, особено за текот на бугарската окупација на Македонија и депортацијата на македонските Евреи во Треблинка.
- „Колозова и Малески, Османи, Ковачевски, Маричиќ, пратеници, бугарските војски не беа ослободители, а Евреите не ги депортираа Македонци“.
- „Не праќајте ги Евреите во гасните комори по втор пат. Не горете ја пепелта по втор пат. Не менувајте ја историјата за да постигнете ваши политички или материјални цели. Кој ќе ја заборави историјата, нема да постои. А вашите политички цели нема да се исполнат. Македонскиот народ нема да заборави ниту да го прости ова“.
- Најголем фаворит за нов папа е филипинскиот кардинал Луис Антонио Тагле, кого го нарекуваат „Азискиот Франциско“. Кладилниците му даваат 40% шанси дека ќе биде избран со двотретинско мнозинство на конклавата во Ватикан.
- Роден во 1957 година во семејство со кинеско-филипински корени, Тагле докторирал теологија во САД, во 2011 година бил назначен за надбискуп на Манила, а во 2012 година за кардинал. Од 2020 година е про-префект за евангелизација, најважното тело во Ватикан за мисионерските работи на Римокатоличката црква.
- Тагле се истакнува меѓу кардиналите со едноставниот стил и блиските односи со обичните луѓе, особено од маргинализираните групи, што му беа белези и на папата Франциско. Течно зборува филипински, италијански, англиски, шпански и француски јазик.
- Речиси подеднакви шанси за нов папа кладилниците му даваат на италијанскиот кардинал Пјетро Паролини, кој е државен секретар на Ватикан од 2013 година. Тој има големо дипломатско и политичко искуство и ја следи теолошката траекторија на Франциско.
- Поради строгата тајност на изборот и политичките игри во Ватикан, Италијанците предупредуваат дека е речиси невозможно да се погоди кој ќе биде нов папа. Тие имаат стара поговорка: Оној што влегува на конклава како папа, излегува како кардинал“.
- Папата Франциско ќе биде погребан в сабота во 10 часот со церемонија на плоштадот пред базиликата „Свети Петар“ во Ватикан, решија кардиналите во Ватикан.
- На погребот се очекува да присуствуваат многумина шефови на држави од светот. Своето присуство веќе го најавија американскиот претседател Доналд Трамп, аргентинскиот Хавиер Милеи, бразилскиот Луиз Инасио Лула да Силва и украинскиот Володимир Зеленски.
- Погребната миса ќе се одржи на отворено. Службата ќе ја води деканот на Колеџот за кардинали, Џовани Батиста Ре, а ќе сослужуваат патријарси, кардинали, архиепископи, бискупи и свештеници од целиот свет.
- Согласно неговата волја од тестаментот, Франциско ќе биде погребан во базиликата „Санта Марија Маџоре“ во Рим, а не во „Свети Петар“, каде што почиваат повеќето негови претходници.
