- Сара Бекстром, 20-годишната припадничка на Националната гарда на САД која беше застрелана од авганистански мигрант во Вашингтон, им подлегнала на прострелните рани. Нејзиниот колега Ендрју Волф сè уште е во критична состојба.
- Претседателот Доналд Трамп го смета нападот за терористички акт. Тој нареди да запре издавањето визи за Авганистанци и проверка на „зелените карти“ за престој во САД за државјани на 19 земји.
- Убиецот е Рахманулах Лаканвал, Авганистанец што пристигнал во САД во 2021 година преку програмата Добредојде за сојузниците на Џо Бајден, со која беа опфатени 76.000 поранешни соработници на американските трупи. Во Авганистан Лаканвал соработувал со ЦИА како „лидер на тим“ и „специјалист за ГПС“.
- Во САД Лаканвал живеел близу Сиетл, на пацифичкиот брег. Се смета дека во Вашингтон пристигнал само заради нападот. Им поставил заседа на гардистите што патролирале околу Белата куќа и од пиштол испукал по неколку куршуми во нив. Бил ранет во престрелка со друга патрола.
- Министерството за финансии на САД продава евра од своите резерви, за да купува јени и да ја заздрави стабилноста на јапонската валута.
- САД обично користеа долари во досегашните интервенции за засилување на туѓи валути. Продажбата на евра е преседан. Сепак, не се очекуваат големи последици за европската валута, затоа што САД ја имаат во ограничени суми во своите резерви. Федералните резерви на САД претходно се консултирале за потегот со Европската централна банка.
- „Инфлацијата во САД во моментов е над целното ниво, па затоа сметаат дека дополнително ослабување на доларот не е најдоброто решение“, објаснува Ли Хардман, виш аналитичар за валути во MUFG.
- Вредноста на јапонската валута во четвртокот падна на 164 јени за 1 долар, што е историски минимум по 1986 година. Вашингтон и Токио договорија заедничка интервенција да го стабилизираат курсот. Со контролираното купување јени, САД ја спречуваат потребата на Јапонија да продава американски државни обврзници, што води кон повисока камата што САД ја плаќаат за своите долгови.
- Полските власти официјално ја обжалија судската пресуда на ЕУ која ја обврзува Полска да му плати 1,3 милијарди долари на фармацевтскиот гигант Фајзер за вакцините против ковид што ги нарачала Европската Унија во име на Варшава.
- „Одлуката на првостепениот суд не ги зема предвид сите релевантни фактички и правни околности на предметот“, објави Министерството за здравство на Полска. Бара да се одложи извршувањето на одлуката додека трае постапката по предметот.
- Основа за казната за Полска е контроверзниот договор помеѓу претседателката на Европската комисија, Урсула фон дер Лејен, и директорот на Фајзер за нарачка на милиони дози на вакцини за ковид за потребите на сите членки на ЕУ. Таинственоста на преговорите ја отвори аферата Фајзергејт.
- Полска во 2022 година одби да ја преземе нарачката поради „променетата епидемиолошка состојба и војната во Украина“. Судот во Брисел на 1 април годинава пресуди дека мора да се почитува обврската кон фармацевтскиот гигант, кој не морал ни да ги произведува вакцините кои Полска ги одбила.
- Прва жртва на судската одлука беше полската служба за воздушна навигација PANSA, на која, иако нема никаква врска со вакцините, ѝ беа замрзнати средствата од европското тело за безбедност во воздухопловството Eurocontrol.
