- Иранскиот претседател Масуд Пезешкијан потврди дека некои земји се нудат да посредуваат за крај на војната што на неговата земја ѝ ја објавија САД и Израел, но порача дека сите такви иницијативи треба да бидат насочени кон агресорите, а не кон Техеран.
- „Да бидеме јасни: ние сме посветени на траен мир во регионот, но нема да се колебаме да го браниме достоинството и суверенитетот на нашата нација. Посредувањето треба да се однесува на оние кои го потценија иранскиот народ и го запалија овој конфликт“, објави Пезешкијан на Икс.
- Откако војната почна во саботата, Катар, Турција, Египет и Оман, се понудија да посредуваат за преговори за крај на конфликтот.
- Иранското Министерство за надворешни работи завчера објави дека е „време за одбрана, а не за дипломатија“. Пезешкијан самиот неколку пати кажа дека е „предоцна за преговори“.
- САД и Израел ја почнаа војната со „превентивни напади“ додека Иран во Женева преговараше со САД за запирање на својата нуклеарна програма. Подоцна беше откриено дека преговорите биле фарса и дека САД веќе биле решени да го нападнат Иран.
- Иран формира нова дигитална платформа за осигурување „Ормуз сејф“, како ново владино тело за управување со бродскиот сообраќај низ Ормускиот проток. Платформата ќе се потпира на плаќања со криптовалути.
- Според планот на Министерството за економија, управувањето со теснецот преку рамка за осигурување би овозможило издавање на разни полиси за поморско осигурување, како и сертификати за финансиска одговорност, наместо да се наплаќа „патарина“. При идеални околности, ова би можело да генерира до 10 милијарди долари приходи за Техеран.
- Планот ќе почне со осигурување кое покрива инспекција, задржување и конфискација на бродови. Штетата од воени напади нема да биде покриена.
- „Овој модел би бил прифатлив за другите земји во мирно време, а сепак би му дозволил на Иран да врши контрола врз теснецот“, објави државната новинска агенција Фарс.
- Молдавските лидери ја осудија како „закана“ одлуката на Владимир Путин да го поедностави процесот на давање руско државјанство на жителите на регионот Придњестровие, кој се отцепи од Молдавија пред 36 години.
- Една половина од жителите на Придњестровие веќе имаат руско државјанство. Декретот на Путин објавен во петокот им овозможува на уште 350.000 луѓе да добијат руски пасоши без да го исполнат условот за постојан престој во Русија.
- „Ова е начин повторно да ни се закануваат, бидејќи на Русија не ѝ се допаѓаат нашите акции за реинтеграција. Веројатно им требаат повеќе луѓе за да испратат во војната во Украина“, изјави молдавската претседателка Маја Санду.
- Рускиот амбасадор во Кишињев, Олег Озеров, изјави дека потегот е од хуманитарни причини, во согласност со меѓународното право, поради „зголемениот притисок“ од Молдавија врз Русите. Тој ги оцени реакциите како „лицемерие“, бидејќи Молдавија им дозволува на нејзини граѓани да добиваат романски пасоши.
- Придњестровие се отцепи во 1990 година, кога Молдавија сè уште беше советска република. По двегодишен судир со повеќе од 1.000 жртви, двете страни се во мир, заштитуван од контингент од 1.500 руски војници. Регионот има свои политички институции - парламент, војска, полиција и поштенски систем.
