- Најмалку 83% од Палестинците убиени во Газа биле цивили, покажуваат податоци од доверливи документи на израелските разузнавачки служби. Израел официјално потврдува дека односот на убиени цивили и милитанти е 1:1 или 2:1.
- Толку висок однос на цивилни и воени жртви од 5:1 речиси и да немало во војните во изминатиот половина век. Единствено во Руанда во 1992 година цивили биле 99,8% од жртвите, а во Сребреница 92%. Во Војната во Босна 57% од жртвите биле цивили, во Украина од 2022 до 2024 година 10%, а во Авганистан од 2001-2021 година 8%.
- Според доверливите податоци на Израелските одбранбени сили, во Газа до мај „сигурно“ биле убиени 7.330 борци на Хамас и Исламски џихад, а „веројатно“ уште 1.570. Во истиот период вкупниот биланс на убиени луѓе во Газа бил 53.000.
- „Известуваме за многумина убиени оперативци на Хамас, но мислам дека повеќето од луѓето што ги регистрираме како мртви всушност не се борци на Хамас. Ги регистрираат како терористи по нивната смрт“, изјавил за порталот „+972“ анонимен израелски разузнавачки офицер што придружувал копнени трупи на теренот.
- Израел реагира дека се манипулира со бројките во извештајот: како „цивили“ се толкуваат и оние вклучени во воени дејства, иако не се членови на воени групи. Примери се пукање, фрлање молотови коктели, обезбедување контролен пункт, поставување или отстранување мини, дејствување како извидувач, набљудувач или обезбедување информации за таргетирање во реално време, саботажа на воена опрема или објекти, транспорт на муниција до фронт за време на борба, и секако држење заложници, што е воено злосторство. Цивилите кои се вклучени во овие активности ја губат својата заштита од напад. Во тој момент тие се борци.
- Бугарското Национално собрание по итна постапка усвои закон што на државата ѝ овозможува да преземе директна контрола врз рафинеријата на руската компанија Лукоил во Бургас.
- Цел на Законот е да се обезбеди работење на најголемата рафинерија на Балканот откако Лукоил поради санкции од САД беше принуден да го продаде својот имот во странство.
- Владата ќе назначи специјален администратор, кој ќе управува со компанијата ако се оцени дека постои ризик по националната или енергетската безбедност на земјата. Бугарската влада тврди дека ова не е национализација, туку „заштитна мерка што ќе се активира само ако работењето на рафинеријата биде загрозено“.
- Администраторот ќе има право да гласа во името на акционерите, да управува со средствата и, ако е потребно, да предложи продажба или преструктурирање на делови од компанијата.
- Рафинеријата во Бургас обезбедува најголем дел од горивата за бугарскиот пазар и овозможува извоз во соседните земји.
- Турција објави налози за апсење на израелскиот премиер Бенјамин Нетанјаху и високи функционери во неговата влада. Ги обвинува за геноцид против Палестинците во Газа и злосторства против човештвото.
- На списокот се 37 израелски функционери, вклучувајќи ги министерот за одбрана Израел Кац, министерот за национална безбедност Итамар Бен Гвир и началникот на Генералштабот на Израелските одбранбени сили Ејал Замир.
- Во соопштението на Анкара се спомнува и инцидентот од март годинава, кога беше гранатирана „Болницата за пријателство“, изградена од Турција во Појасот Газа. Израелските одбранбени сили во тоа време соопштија дека објектот го користеле оперативци на Хамас и дека „не бил користен како активна болница повеќе од една година“.
- Отфрлајќи ги обвиненијата, израелскиот министер за надворешни работи Гидеон Саар ги нарече „најновата пи-ар акција на тиранинот Ердоган“.
- „Налозите за апсење на високи израелски функционери јасно објаснуваат зошто Турција не треба да биде присутна во Појасот Газа - директно или индиректно“, порача поранешниот министер за надворешни работи Авигдор Либерман. Турција сака да биде дел од меѓународните сили за стабилизација од планот на Доналд Трамп за повоена Газа.
