Вести › Набрзинка

Папата најпочитуван, Маск најомразен во САД

6 август 2025

Првиот американски папа Лав 14-ти е убедливо најценетиот светски лидер меѓу граѓаните на САД, покажува нова анкета на Галуп спроведена при крајот на јули.
Од 14 светски личности за кои 1.002 испитаници се изјасниле поволно или неповолно, единствено тројца завршиле со позитивен резултат. Папата е очекуван фаворит, но другите двајца се големо изненадување - украинскиот претседател Володимир Зеленски (за кого поволно се изјасниле 52% и неповолно 34%) и сенаторот Берни Сандерс (49%-38%).
Високо котира дури и францускиот претседател Емануел Макрон со 30% позитивни мислења и 31% негативни.
Американците имаат најлошо мислење за израелскиот премиер Бенјамин Нетанјаху (29% поволно и 52% неповолно) и за милијардерот Илон Маск (33%-61%).
Иако е најпопуларен лик за републиканските гласачи, претседателот Доналд Трамп со нето-резултат од -16 е при дното на листата, зад министерот за здравство Роберт Кенеди Џуниор (-5), поранешниот претседател Џо Бајден (-11) и актуелниот потпретседател Џеј Ди Венс (-11).

извор

Новиот полски претседател решен да го смени Уставот

6 август 2025

Веднаш откако ја даде свечената заклетва, новиот полски претседател Карол Навроцки најави иницијатива за промена на Уставот со цел да го заштити суверенитетот.
„Полскиот Устав неодамна беше толку многу нарушуван, поради што ние како политичка класа мора да почнеме да работиме на нов Устав, кој би бил спремен за усвојување верувам до 2030 година“, кажа Навроцки во инаугуративното обраќање до Парламентот.
Тој не објасни што конкретно треба да биде променето во Уставот. За секоја промена потребно е одобрување од двотретинско мнозинство во Парламентот. Партијата Право и правда, чиј кандидат беше Навроцки, е во опозиција, но се надева дека претседателот може да ја приближи до мнозинство на изборите во 2027 година.
Како популист што го споредуваат со Доналд Трамп, се очекува Навроцки да блокира многу закони од проевропската влада на Доналд Туск. Навроцки се спротивставува на нелегалната миграција и усвојувањето на еврото и вети дека ќе се спротивстави на секој обид од Брисел да ѝ одземе моќ на Полска.
„Ќе бидам гласот на оние што сакаат суверена Полска, која е во Европската Унија, но е и ќе остане Полска“, порача новиот претседател.

извор

Укинат му е мандатот на Додик, тој не се предава

6 август 2025

Централната изборна комисија на БиХ едногласно му го укинала мандатот за претседател на Република Српска на Милорад Додик, со што започна спроведувањето на судската одлука со која тој беше осуден на една година затвор и 6 години забрана за политичко дејствување.
Одлуката ќе стане правосилна ако Апелациониот суд ја потврди судската казна по што треба да се распишат предвремени избори во рок од 90 дена.
„Уште едно срање од Сараево“, прокоментира Додик кој порача дека не ја признава ни институцијата ни одлуката која ја донеле. „Предавање не е опција,“ порача тој.
„Милорад Додик е секогаш добредојден на територијата на Република Србија. Тој е легално и легитимно избран претседател на Република Српска. Малку сум и љубоморен колку е популарен,“ изјави пред некој ден Александар Вучиќ.

извор